Tempo ta keda e mihor maestro pa huzga maneho Wever-Croes
*Uno di e rutanan scondi di mayor corupcion a wordo gescrap
*Analisis di escandalonan ta confirma abuso di e suelo di Aruba
ORANJESTAD(AAN)- Na 2020 Prome Ministro Evelyn Wever-Croes a tuma uno di e decisionnan mas importante pa cuida e bienestar di Aruba y di e Arubiano.
E decision na November 2020 di Prome Ministro Wever-Croes, a cera e rutanan scondi di corupcion, haciendo uso di tereno.
November 2020 a topa cu Prome Ministro Wever-Croes encarga cu asuntonan di tereno tambe despues di cambionan den su gabinete. Mester a yega na un decision pa separa decision politico directo for di tereno y esaki ta e paso cu el a tuma.
Ora analisa escandalonan di ayera y awe, e decision di Prome Ministro Wever-Croes ta haya un balor historico.
Pa comprende corupcion, nos mester observa un fruta. Pafor e ta bunita y casi un hende no por spera e momento pa cuminsa come.
Ora corta e fruta, ta descubri kico ta sconde paden, cu ta completamente putri. Corupcion a destrui e fruta, cu ta resulta den baki di sushi.
Esaki ta exactamente loke ta pasa den un comunidad ora personanan cu e posibilidad, ta abusa di e poder cu a entrega nan y ta uza nan puesto pa na forma scondi destrui e base di democracia, cu ta bienestar di Pueblo.
Pa un funcionario di Gobierno abusa di su poder y entrega placa di Pueblo directamente na un ladron ta dificil.
Leynan ta describi con por gasta placa di Pueblo, pero tur regla por wordo kibra dor di hende bibo, cu hunto cu complicenan ta sigui ruta scondi.
Veredicto di Huez a duna prueba den Corte con por abusa di e maneho di permiso pa drenta y keda na Aruba, manera e caso penal contra ex Ministro Paul Croes di Gobierno Mike Eman, a trece dilanti.
Permiso, servicionan, compra di articulonan y otorgamento di tereno, ta figura riba e lista di rutanan mas importante di placa di corupcion.
Reparti tereno di Pueblo ta keda uno di e formanan mas facil pa abusa di poder di un politico y su grupito cu ta haci bofon di leynan cu a wordo introduci pa proteha bienestar di Pueblo.
Corupcion cu tereno ta basa riba entrega ilegal di e suelo di Aruba, cu ta nifica ladronicia di loke ta di Aruba y di e Arubiano.
Con un hende of negoshi ta haya tereno den erfpacht por ehempel? Con un hende por bira doño di un parti di e suelo di Aruba na un prijs abou?
E hende ta presenta su peticion a base di loke ley ta bisa. Por ehempel, un Arubiano ta presenta su proyecto, cu segun e ta splica lo ta productivo pa comunidad ya cu e ta sostene economia, belasting pa Gobierno y trabou pa hende.
E ta haya tereno, ta haya permiso pa construi, ta haya tur beneficio cu ta wordo entrega na e persona of compania cu por sostene economia.
Kico realmente e ta haci cu e tereno?
Falsificacion di documentonan pa crea un imagen falso di e transaccion, ta nifica placa den cartera di politiconan of funcionarionan envolvi.
Tereno asina ta bira negoshi ilegal di un politico of funcionario, cu ta bende un derecho riba loke ta di Pueblo.
Aruba ta un Estado di Ley. Tur loke socede mester ta segun Ley, cu ta e parti bunita di e fruta, cu realmente putri y criminal.
Esaki ta nifica cu e funcionamento real di gobernacion ta putri y ta destrui e Estado di Ley, cu ta bira un cueba di ladron.
Ora analisa escandalonan na Aruba, tereno ta hunga un papel importante.
E negoshi of persona cu ta wordo beneficia na forma ilegal dor di un politico, por competi cu e producto criminal cu ta resulta di su accion, contra ciudadanonan cu si ta tene nan mes na ley.
Segun e regla di Democracia, e loke ta bon ta wordo premia y e loke ta malo ta wordo castiga.
Corupcion ta premia loke ta malo (cu ta destrui comunidad y hende) pa castiga e persona cu si ta sigui reglanan y cu ta hende honesto.
Corupcion ta haci cu loke ta malo, ta canta victoria riba loke ta bon.
Awe cu escandalo basa riba tereno di Gobierno ta rementa den Corte di Husticia, e decision di Prome Ministro Wever-Croes pa kita e poder pa un politico por dicidi riba tereno, ta bira historico.
Casonan legal importante manera e caso Avestruz cu ta revela posibilidadnan pa horta Pueblo cu Huez mester dicidi si nan a tuma lugar.
Pa e contenido di democracia, e decision di Evelyn Wever-Croes pa saca maneho di tereno for di man politico, a bira historico y e herment pa deshaci di abuso politico cu suelo di Aruba.
