Presidente di Parlamento Marlon Sneek:
ORANJESTAD (AAN) – Presidente di Parlamento, Marlon Sneek, den entrevista cu DIARIO a splica cu e proyecto pa basha un parti di Parlamento abao, ta uno cu ta canando caba for di prome cu el a wordo scogi den e funcion aki.
“Loke ta bay sosode ta cu nan ta bay kita e edificio bieu y e mesun forma di ‘T’ cu tin eynan ta bin bek.
Na luga di tin un dak halto ta bay tin un dak plat. Tin cierto facilidadnan cu lo bay haya atencion den e edificio nobo. Djis mi mester bisa cu tin un retraso pasobra ora nan a bay cuminza a tuma nota cu tabatin asbesto den loke ta e vloer, anto mester a warda un rato pa agrega esaki, pasobra e no tabata den e bestek, anto por a haci e trabao di saca e asbestos anto e ora ey nan por bay over na e parti di demole e edificio ey, y cuminza e proceso pa traha esun nobo”, Presidente di Parlamento a relata.
Sneek a splica cu e edificio nobo aki lo crea mas espacio, pasobra e personal aworaki ta den un espacio masha limita. No tin suficiente lugar pa nan pero pa e diferente fraccionnan tampoco, por ehemplo, pa e “Fraktie Medewerkernan” cu tin aworaki.
“Aworaki e mesun parlamentarionan ta coopera pa nan Medewerkernan traha den nan mes oficina pasobra no tin suficiente lugar. Ora cu esaki keda cla, nos por bisa cu nos ta bay bek na normalidad, cu tur hende ta haya nan lugar pa nan sinta, manera mester ta”, Parlamentario Marlon Sneek a agrega.
Incluso, el a comenta, tin cierto Medewerkernan cu ta dos, dos, den un oficina, cooperando pa e parlamentarionan por haci e trabao patras, y ora nan ta cla por pasa bek pa nan oficina habitual.
Sneek no ta kere cu por keda cla pa e aña aki, pasobra e tabata programa pa 120 dia di trabao. Eigenlijk dia 12 di April lo mester a cuminza cu e trabao ey, pero cu e retraso cu tabata tin, e trabao lo bay cay un tiki atras.
“Mi ta spera cu en cooperacion cu e Compania ALBO, cu ta esun cu a gana e oferta nan lo por pone un tiki esfuerzo y gana e tempo cu a bay perdi den e tratamento pa saca e asbesto” Presidente di Parlamento, Maron Sneek a señala.
