Debate ta importante pa trece un balansa entre ideanan y ideologianan

Parlamento Hubenil

ORANJESTAD (AAN):  Diadomingo, Minister di Husticia y Asuntonan Social Rocco Tjon tabata presente na e “debate and speaking championship” organisa pa Parlamento Hubenil, caminda e tema tabata “inclusion pa tur mucha”. Esaki en conexion cu dia 20 di November tabata dia internacional di derecho di mucha. E mandatario a expresa di ta contento di wak cu derechonan di mucha ta wordo celebra, den e caso aki door di Parlamento Hubenil. Un organisacion activo cu nos como Gobierno ta reuni regular cune y kier conta cu nan participacion den proyectonan.

  Como Minister encarga cu Husticia, e ta un placer pa wak cu a scoge pa celebra e dia aki den forma di un debate. Den un estado di derecho, debatenan ta importante pa trece un balansa entre ideanan y ideologianan. Un debate ta contribui na e desaroyo personal di cada un di nos hobennan participante. E ta yuda forma e lidernan di futuro, pero tambe e ta contribui na un miho comunidad. Pa e motibo aki ta un honor pa mira cu nos hobennan ta scoge conscientemente pa prepara nan mes amplia nan conocemento y mas cu tur permiti nan bos resona, cual por cierto ta un derecho fundamental.

   E realidad ta, cu e no ta facil pa para dilanti un publico y expresa bo opinion, pensamento y sentimento. E ta sumamente importante pa nos crea ciudadanonan cu no solamente tin e curashi di expresa nan opinion, pero cu sa con pa expresa esaki tambe. Pa e motibo ey e ta di aplaudi cu nos hobennan na un edad hoben ya caba a tuma e iniciativa pa cuminsa desaroya nan mes den e area aki.

   Por ultimo, e mandatario a desea e dos ekiponan di debate tur clase di exito, como tambe tur e hobennan cu a bay comparti nan mensahe cu pueblo di Aruba. Na mes momento a encurasha cada hoben presente pa sigui haci uzo di oportunidadnan manera esaki pa amplia nan conocemento, adkiri habilidadnan, haya experencia, practica tur locual nan ta siña  pero mas cu tur pa keda desaroya e lider den nan.