Deaxo Croes ta conta con el a experiencia su hazaña cruzando lama entre Corsou y Bonaire

Hopi gratitud pa su team sin cual lo no a logra:

ORANJESTAD (AAN) – DIARIO a entrevista Deaxo Croes, ken a realiza un tremendo hazaña den fin di siman, cu el a cruza lama entre Bonaire y Corsou, cu e meta di crea un fondo pa prevencion di e malesa di cancer, pa yuda e instancianan cu ta traha riba e tereno aki.

            Croes a relata pa redaccion con su experiencia tabata ora di realiza su hazaña. El a duna di conoce cu tabata tin momentonan cu e esfuerzonan tabata duro, e contratemponan cu por haya riba lama y cu nunca no por premira, y tur esaki a wordo cumpli no solamente door di su persona pero door di full e team.

            Deaxo a splica cu e ultimo cinco miyanan tabata esnan di mas fuerte cu el a yega di landa, pasobra lama tabata hopi bruha, cu hopi oleahe, pero e coriente danki Dios tabata na nan fabor. E ta sinti hopi afortuna cu esey, y nan a yega exactamente na unda nan a planea pa yega.

            El a comenta, tocante e dos hobennan cu ta mire como nan lider, y awor manera un heroe, cu nan tin un potencial sumamente grandi y el a laga nan experiencia esaki pa aporta un granito di arena na tur e briyo cu nan tin pa e deporte cu nan ta siguiendo y pa laga nan sa cu nan tin un soño pero cu nan ta bay haya contratempo y nan tin cu djis traha riba dje y lo logra.

            El a expresa cu sin su team nada e lo no por a logra, y esaki tabata manera un hazaña di nan tambe, e Kayak a keda 14 ora den awa mientras e capitan tabata wantando e direccion cu nan mester a bay, y tur hende a colabora pa esaki ta un exito total.

            Pa aworaki Deaxo no tin plannan riba mes, sino cu e ta bay enfoca riba su famia, cu e ta sinti cu a neglisha pa un tempo, como tambe amistadnan cu el a pone un banda, pa e dedica na e hazaña aki.

            Deaxo a indica cu mirando e dianan di fiesta aki, tempo ta cortico y e contorno riba cual nan a dedica e landamento aki ta mustra mas cu claro, cu e tempo ta cortico pa nan tur. El a reitera cu awo e ta enfoca riba famia y amistadnan y despues e lo worry kico ta bay sigui  y na momento cu e prepara pa otro hazaña, pueblo lo haya informacion.