‘Crossing for Prevention’
ORANJESTAD (AAN): Crossing for Prevention ta tuma lugar dia 19 di November. E landado di distancia largo Deaxo Croes lo haci un intento di landa 53 km for di Bonaire pa Curaçao; no solamente pa demostra curashi, pasion y resistencia fisico y mental, pero tambe pa duna un aporte na tres fundacion cu ta haci un trabao inmenso pa Aruba, Bonaire y Curaçao. Cancer ta afecta nos tur y ta p’esey nos tur hunto mester traha y colabora pa yuda cu prevencion di cancer riba nos islanan.
Ta pesey, mientras cu Deaxo Croes ta sigui prepara su mes fisica y mentalmente pa e hazaña cu el a pone su dilanti, ta importante pa un y tur sa cu por cuminsa haci donacion caba na e fundacionnan beneficiario di Crossing For Prevention. Abo ta scoge cua bo kier aporta na dje a traves di e website of un transferencia bancario directo.
Nan ta: Fundacion CORESA (Colorectal Screening Aruba), Fundashon Prevenshon Curacao y Kankerfonds Bonaire.
Pa yuda bo den e escogencia, aki ta trece dilanti un perfil di cada fundacion pa asina tur hende sa kico cada un ta para p’e y con ta hiba nan operacion. Cada un ta realisa un labor balioso pa e comunidad di nos islanan ruman.
Na Aruba tin Fundacion CORESA, cu nifica Colorectal Secreening Aruba, cual ta un fundacion basta hoben lanta door di tres docter specialista yiu di tera, Christopher Franca, Justin Smit y Marcel Ho-Kang-You. Cancer di tripa, tambe conoci como cancer di colon, cancer colorectal of cancer di rectum, ta un enfermedad cu ta causa e celnan den bo colon of rectum pa crece na un manera incontrolabel. Ta importante pa comunidad sa cu, cu solamente 1 screening bo por salba bo bidapa motibo cu e screening lo por detecta algo cu tin e potencial di bira cancer den futuroy por elimin’e na tempo. Cancer di tripa ta den e top 3 tipo di cancer mas comun na mundo. Pa e motibo aki mester bin mas esfuerso den nos comunidad pa educa nos poblacion tocante e riesgo, sintoma y tratamentonan. Pa mas informacion por bishita www.fundacioncoresa.com. Informacion bancario ta: Fundacion Coresa, Aruba Bank, #6031390190.
Na Bonaire tin Kankerfonds Fonds Bonaire ta funciona cu tresmiembro di directiva yshetepersona cu ta duna man riba base diario, tur di forma boluntario. Ta ofrece informacion na pashent y ex pashent di cancer riba, entre otro, con pa sigui biba cu e malesa, ademas di participacion den actividad social y conscientisacion. Entre otro ta organiza lectura cu ta habri na henter comunidad.Na momento cu un persona sa cu e ta pashent di cancer, e por inscribi mesora como cliente di e fundacion. Kanker Fonds Bonaire ta traha completamente riba donacion. Nan tin un sede ubica na caminda La Union 11, ex-cas di pareha Palman cu Fundashon Mariadal a herede y a pone na disposicion di e fundacion. Pa mas informacion por bishita: www.kankerfondsbonaire.com. Informacion bancario ta: Kanker Fonds Boanire, Maduro & Curiel’s Bank
Bonaire N.V. #101191602 of RBC Bank N.V., #84000000180282769.
Na Curaçao tin Fundacion Prevenshon Curaçao. Riba iniciativa di professor Dr. H.M. Pinedo y difunto Lionel Capriles, e fundacion aki a lanta dia 23 di december 2008 cu e meta di percura cu mas tanto persona posibel na Curaçao ta haci e saminacion necesario pa detecta y consecuentemente trata cancer na tempo.
Den sociedad cu Gobierno di Curaçao, sector comercial y otro organizacionnan ta yega na mas tanto persona den grupo di riesgo y yuda pa nan presenta na nan cita di screening. Esey ta posibel door di, entre otro, un acuerdo cu e registro civil di Curaçao (Kranshi) cu ta suministra un bista di e personanan di cierto edad. Ta comunica cu nan via post of telefonicamente, brinda servicio gratis di transporte pa y for di e screening y asistencia den pospone e cita pa otro fecha. Ta traha activamente riba screening pa cancer di pecho, di matris y di colon. Pa mas informacion por bishita: www.fundashonprevenshon.com. Informacion bancario ta: Fundashon Prevenshon, Maduro & Curiel’s Bank (MCB), #21684310.
Di antemano of si bo a hacie caba, Deaxo Croes y tur esunnan tras di Crossing For Prevention ta yama bo danki pa bo aporte y ban encurasha mas hende pa participa tambe. Si bo no a hacie ainda, bishita www.crossingforprevention pa haci bo donacion facilmente y keda sigui tur desaroyo y preparacion riba
plataformanan social pa e gran fecha di dia 19 di november proximo. Danki particular ta bay pa e patrocinadornan.
