Parlamentario Marco Berlis (MEP):
ORANJESTAD (AAN): Ya pa varios aña Departamento di Asuntonan Economico (DEACI), ta publica e lista di Macuto di Compras. E lista aki ta informa pueblo detayadamente cual ta e supermercadonan mas economico y cual ta esnan cu ta mas caro. No tin nodi core riba bao gasta gasoline pa cumpra productonan mas barata aki y otro aya. DEACI ta update y publica e lista aki cu ta contene tur informacion necesario pa cumpra productonan na e miho prijs, mayoria biaha ne mesun supermercado. E lista aki ta wordo traha di productonan cu NO ta cay bao canasta basico. Kiermen pueblo por wak y uza e lista unda por shop mas economico!
Pueblo por haci uzo di e lista di “Macuto di Compras”
Pueblo por wak e lista aki di Macuto di Compras den corant y Facebook. DEACI ta update esaki frecuentemente. DEACI a traha un lista den cual abo como consumidor por wak comparacion di prijsnan entre diferente supermercadonan cu ta keda na diferente distritonan di nos isla. E lista di Macuto di Compras ta brinda e consumidor e siguiente informacion;
- Na man robes di e lista bo por wak e productonan. E productonan akinan NO ta den canasta basico.
- Na e siguiente columna bo por wak e contenido/peso di e producto.
- Despues pueblo por wak e diferente supermercadonan na diferente districtonan di cual ta comparando prijs.
- Lista di Macuto di Compras ta wordo “updated” cada bes cu informacion di prijs di producto di otro supermercadonan den tur distrito. Asina pueblo por scoge diferente supermercado den nan vecindario of distrito unda nan por haci compras mas barata.
- Adicionalmente, por wak e prijs cu cada supermercado ta bende e producto. Ta “subraya/highlight” e sumanan di e articulonan cu ta wordo bendi mas barata y por wak number di e supermercado.
- Por ripara cu mayoria di biaha ta e mesun supermercado aki ta bende su productonan mas barata ke otronan.
- Despues di a analisa e lista di comparacion di e “Macuto di Compras” e consumidor por deduci cu exactitud cual te supermercadonan mas economico.
- E lista di Macuto di compras ta demostra cu gobierno TA haci e trabao di control di producto cu NO ta cay bao e canasta basico. Corda cu e ley di “Free Enterprise” ta duna e negoshi e poder pa determina prijs di productonan cu NO ta cay bao canasta basico. Awor cu e lista di Macuto di Compras di DEACI, pueblo por scoge pa cumpra na un supermercado cu ta cumbini mas.
- Control di productonan cu ta cay bao e Canasta Basico ta sucede diariamente.
DEACI su lista di “Macuto di Compras” ta yuda pueblo
Cu e lista di Macuto di Compras pueblo ta scoge y pueblo ta hues. Bishita e facebook di DEACI frecuentemente pa analisa e lista di Macuto di Compras y keda na altura riba desaroyo di prijs riba nos isla. Wak pa bo mes y asina spaar placa cumprando na e supermercadonan mas economico cu ta bende mas pa menos!
