ORANJESTAD (AAN): A traves di e wega “Kraak de koffer” di Loteria di Codigo Postal Hulandes (NPL),
actor Everon Jackson Hooi di Corsou a duna 10.000 euro na Dutch Caribbean Nature Alliance (DCNA). DCNA lo uza e placa aki pa proyecto pa salvaguarda naturalesa den Caribe Hulandes door di yuda y duna sosten na e Organisacionnan di Maneho di Area Proteha na Aruba, Boneiro, Corsou, Saba, St Eustatius y St Maarten.
DCNA ta masha agradeci pa e donacion. Naturalesa den e islanan di Caribe Hulandes, manera nan rifnan di coral, mangel y boskenan enano ta unico y importante, pero tambe fragil y menasa.
Ta bay uza e placa entre otro, den actividad destina pa fortalece e capacidad institucional y posicion financiero di e Organisacionnan di Maneho di Area Proteha, educacion tocante naturalesa pa hoben y pa promove conscientisacion y crea sentido di accion di urgencia pa aborda desafio global di conservacion (manera cambio climatico) den e parte Caribense di Reino.
Tocante DCNA y Loteria di Codigo Postal
DCNA ta un organisacion no lucrativo crea pa proteha ambiente natural y pa promove maneho sostenibel di recurso natural, tanto riba tera como den lama, den e seis islanan di Caribe Hulandes. E mision di DCNA ta pa salvaguarda naturalesa den Caribe Hulandes y pa yuda y duna sosten na e Organisacionnan di Maneho di Area Proteha.
Door di crea un voz uni, yuda sigura fuente sostenibel di financiacion, comparti recurso, habilidad y experiencia y promove divulgacion educativo y consciencia publico, DCNA por fortalece e red y por apoya e iniciativanan di conservacion di naturalesa den henter Caribe Hulandes.
DCNA tin mas di un decada di historia cu Loteria di codigo postal Hulandes y su donacionnan benefico of "Goede Doelen". Desde 2008, DCNA a bira beneficiario completo di Loteria di Codigo Postal Hulandes y ta ricibi un subsidio anual cada aña.
Tocante Everon Jackson Hooi
Everon Jackson Michael Werner Hooi (Corsou, 30 di mei 1982) ta un actor Hulandes descendiente di Corsou. E ta conoci pa su rol di Bing Mauricius den Goede tijden, slechte tijden, pero tambe pa su rol di Ciro Pieterszoon den e serie di RTL De Erfenis.
Potret: Everon Jackson Hooi ta haci donacion di 10.000 EUR a traves di NPL na DCNA. Potret na cortesia di: NPL
