Datonan actualisa di Covid-19 a eleva e cifranan di morto registra na Aruba na 211

13 residente a fayece na Colombia

ORANJESTAD (AAN): Siman a habri cu 7 persona recupera y un total di 11 caso nobo di COVID-19 cu a keda registra di cual 2 ta no-residente. E cifranan aki ta representa un 'Positivity rate' bou di e residentenan di 39% y e cantidad di casonan activo di COVID-19 ta 52.

E cantidad di fayecidonan relaciona cu COVID-19 na Aruba ta 198 y datonan ricibi di pashentnan cu desde juli 2021 a wordo transporta pa tratamento medico na Colombia relaciona cu COVID ta indica cu 13 residente lamentablemente a fayece.

E proceduranan administrativo te cu awor a keda completa y por wordo incorpora den e data total di fayecidonan di Pandemia di Covid-19 di Aruba. Forsa na famia di tur e fayecidonan cu apesar di tur esfuerso haci toch a perde e bataya contra COVID durante e ultimo lunanan.

 E dato recien aki ta eleva e cifranan di morto registra na Aruba na 211.

Datonan regular ta ilustra casonan nobo di COVID cu un averahe semanal di 15 caso pa dia y un averahe di 'Positivity rate' semanal di 24% pa dia.

Actualmente na Aruba tin 8 persona interna cu of debi na COVID di cual den ICU tin 1 persona y riba piso general tin 7. Na Colombia tin actualmente 6 persona den ICU y ningun (0) riba piso general.