Marceylaine Paskel di DAS:
ORANJESTAD (AAN) Marceylaine Paskel, Relacionista Publico di Departamento di Asuntonan Social (DAS), den entrevista cu DIARIO a menciona cu nan ta traha pa gruponan di persona cu tin problema social.
“Mi lo no ta durf pa bisa cu nos ta traha pa un grupo so, pasobra nos ta traha pa nos tur. Nos tin peticionnan pa drenta den tur grupo meta, ora nos ta sirbi nan, basa riba nos cuater servicio. Claramente nos ta menciona cu cada caso ta diferente, y tin momentonan cu apesar cu nos ta duna e servicio tin leynan cu no ta duna nos e oportunidad aki”, Paskel a indica.
El a agrega cu na cada persona cu bin na DAS ta wordo bisa pa nan traha hunto, pa yega na e meta final, cu ta cu e ta haya e sosten cu e persona merece.
“Nos ta traha hunto incansable y bo no ta bo so. Mi por bisa cu nos ta den e proceso di conecta hunto cu e barionan, anto pa nan ta pendiente pasobra nos ta bay subi caya. Pa adulto mayor, mi por bisa cu nos ta dunando nan servicionan caba. Nos tin cuater servicio cu nos por brinda nos adulto mayor, pero pa pensionado ta tres. Nos tin abogado liber, nos tin seccion di famia y guia social, y basa riba nan necesidadnan e porta ta habri na DAS pa nan por ricibi e asistencia aki.
