Inspector señora Joselynn Angela:
ORANJESTAD (AAN) Otro asunto cu señora Roselynn Angela (Inspector di Remedi na Aruba) ta haya preocupante, ta cu entre e productonan cu ta bin di afo, di manera ilegal, tin antibiotica y productonan pa dolor.
“E remedinan pa dolor cu nan ta trece ta remedinan cu hopi biaha mester ta bao supervision di docter. Anto, den paisnan Latino no ta haya nan cu receta, anto nan ta purba di trece nan na Aruba”, señora Angela ta indica.
E mercado aki ta loke ta conoci tambe como “mercado negro” y por wak diferente trend nan ta forzando, ya cu Departamento di Salud Publico tin mas control riba caya, y esnan cu ta trece e remedinan ilegal ta cambiando nan estrategia con nan ta wordo bendi, y tambe tin e parti di e suplementonan, señora Angela a subraya.
“Conhuntamente cu Curacao, nos ta hopi activo pa analiza e productonan, y pa saca nan for di mercado, y ademas di productonan pa dolor nan ta trece Viagra, pa relacion intimo” señora Angela a agrega.
E Inspector a añadi cu nan tin indicacion ken ta bende e productonan aki, y e ta reitera cu nan ta investigando riba dje.
El a señala cu si bo haya un producto ilegal e ta caba castigable conforme ley, e boet maximo cu e persona por haya ta 500 mil Florin, y si e persona cu ta aplica e remedi no ta capacita pa haci’e, tambe ta castigable via e ley. Tambe tin un maximo boet di 500 mil Florin.
“Aworaki nos ta analizando e mercado pa wak ki estratega lo tuma”, señora Joselynn Angela, Inspector di Remedi a enfatiza.
