"Danki na tur esnan cu ta contribui na e fundeshi di nos futuro generacion"

Mensahe di fin di aña escolar di Prome Minister

ORANJESTAD (AAN): Diabierna 8 di juli, e aña escolar 2021/2022 a yega su final. Un aña cu hopi reto. Prome Minister ta desea den su mensahe pa fin di aña escolar aki, ta gradici tur esnan cu ta contribui na e fundeshi di nos futuro generacion cada aña.

            “Saliendo di e pandemia, mas y mas ta bira cla cuanto daño e pandemia a ocasiona. Tin parti di e materianan cu nos a logra recupera, pero tin algun cu no por a wordo recupera ainda. Sinembargo, nos ta wak atras na un aña exitoso.

            Pabien na tur esnan cu a pasa e aña aki cu exito, trabou duro y sacrificionan sigur a duna nan fruto. Pabien especial na tur graduado cu awor ta bay cuminsa un siguiente etapa den nan bida, hopi exito. Na esnan cu no a pasa e aña cu exito, tuma un descanso awor den vakantie, y despues cuminsa bek yen di energia. Cuminsa cu un actitud positivo, cu e biaha aki si bo ta bay logr’e. Corda, ora bo bisti e bril positivo, bo ta mira tur e solucionnan y oportunidadnan, si bo bisti e bril negativo, bo lo mira problema y desafio so.

            Na Mayornan, danki di curason pa guia y stimula boso yiunan den nan estudio. Ban sigui apoya nan, sigui guia nan, pasobra nan mester di nos, pa con grandi cu nan bira.

            Na docentenan: un danki di curason, boso tabata tin e tarea noble pero pisa di guia nos studiantenan pa logra nan meta, y na caminda indudablemente boso a inspira nan, y boso a yuda forma nan fundeshi. Pabien cu e exitonan di e aña escolar aki.

            Awor tur preparativo ta wordo haci pa aña escolar 2022/2023, y mi tin tur confiansa cu e aña escolar nobo lo ta uno exitoso. Goza hopi di e vakantie bon mereci”.