Prome Minister Evelyn Wever-Croes:
ORANJESTAD (AAN) – Dialuna mainta a tuma lugar e prome conferencia di prensa semanal di Gobierno, den cual Prome Minister Evelyn Wever-Croes, a hiba palabra. El a cuminza bisando cu Aruba ta den pleno recuperacion, y danki Dios e efectonan devastador di e pandemia ta kedando atras.
E mandatario a señala cu turismo ya caba a surpasa e nivelnan di prome cu e pandemia, y pa loke ta entradanan di turismo Aruba ta na 118%, compara cu prome cu pandemia.
“Nos ta mira nos economia creciendo, y pa e aña aki ta premira cu e lo surpasa y nos ta na 101% di e situacion cu tabata tin prome cu e pandemia, cu un crecemento economico cu a wordo premira na 4.5% pa e aña aki, y nos ta pendiente di e cifranan di cuanto e ta bay ta exactamente, y e lo wordo informa dentro di poco. Pero en todo caso, e ta bayendo miho di locual nos a spera caba”, e dignatario a declara.
Prome Minister a referi tambe na e tema di desempleo. El a expresa cu gobierno no kier crecemento economico djis pa esaki como tal, pero e kier crecemento economico pa crea cuponan di empleo.
“Nos a mira cu mas di 1500 mama cu tata di famia a haya trabao, E cifra di desempleo prome cu e pandemia tabata na 5.2% y durante e pandemia a subi te na 8.8%. Awo ta na 6.5%, kiermen e ta bahando for di e porcentahe di durante e pandemia, pero ainda no a yega na e nivel di 2019”, e dignatario a señala.
Prome Minister a indica cu aki tin trabao pa haci y tin plannan concreto tambe pa con gobierno lo bay logra yega pa mas hende por haya trabao, mientras cu nan sa cu e situacion ta dificil pero contento di por menciona cu, por ehemplo, 24 cas social a wordo entrega fin di aña pasa y ta trahando na 48 cas social mas pa wordo entrega prome cu e fin di aña aki.
E mandatario a agrega cu Finanzas tambe ta bayendo den bon direccion cu un surplus, pero mas importante ta cu riba e proyeccionnan pa diferente aña, tambe ta mira surplusnan; y gobierno tambe a tuma e decision ya caba, pa no solamente recupera pa yega e nivel di prome cu pandemia pero pa recupera miho, y den esaki gobierno ta trahando atravez di e Landspakketnan, riba diferente reforma.
