Na November 2022 e trabou den silencio a cumpli cuatro aña
*Sacrificio di voluntario mester haya tur sosten di comunidad
*Formula pa balor di hende ta sorprende den e era material
ORANJESTAD (AAN) — Ki balor hende tin? Esaki e pregunta cu manera na tanto ocasion DIARIO a mustra, ta e puntra central di democracia y di constitucion di Aruba.
Balor di hende ta asina grandi cu na momento cu Covid-19 a ataca, economia a wordo paralisa y Florin a stop di lora pa wordo uza na tur e formanan cu mester a proteha bida di hende y sali na defensa di salud di e ser humano.
Te awe den comunidad, tin un problema serio cu comprension real di e balor di e ser humano, manera por mira den accidentenan cu ta pone fin na bida di hende of ta transforma bida den un dal di lagrima.
Ta den un mundo cu hopi bez ta wordo considera egoista, sin balor di hende, hasta materialista, DIARIO a descubri e trabou impagable di cantidad di gruponan di voluntario cu ora tur hende ta drumi, ta pone nan horanan pa diverti nan mes, na disposicion di esnan cu ta sufri of ta den problema.
Cuido Medico ta e alma di bienestar di hende cu a conoce mannan bondadoso for di e momento cu el a haci su entrada oficialmente na Aruba. Trabou voluntario den e sector aki a sostene Aruba te na un grado, cu Aruba como isla chikito por enfrenta e paisnan di mas grandi cu su calidad di cuido.
Sinembargo, a keda espacio bashi cu tabata tin mester di atencion, sigur den e mundo moderno cambiante cu den organisacionnan nobo cu ta bini dilanti, ta duna prueba cu e no a perde su alma.
Na November 2022, DIARIO a presenta un relato relaciona cu e hecho cu Hospice Aruba a cumpli cuatro aña.
Awe na caminda di e organisacion pa su cinco lustro, DIARIO ta expone e tremendo labor cu ta wordo eherce pa e organisacion, na e momento mas dificil den bida di hende, cu ta e momento di despedida.
Kico un hende ta experencia ora e realisa cu e no tin bida mas y cu no tin tempo mas riba holoshi di su bida?
Cuido medico a conoce avancenan grandi cu ta haci posibel pa atende cu mayoria di enfermedad y alarga bida di hende.
Sinembargo, cada hende a nace cu su hora di despedi cu no ta nada facil pasobra mester despedi di tur loke tabata parti di bida normal.
Tin enfermedad cu ta sorprende hende y no ta duna oportunidad pa hende despedi. E ta hopi dificil pa esnan cu keda atras.
Tin sufrimento pa motibo di enfermedad cu progresa y lentamente ta afecta bida di hende den un proceso destructivo.
Ta yega e momento cu cuido curativo no por haci nada mas pa e persona, cu mester ricibi cuido palativo.
Na momento cu speransa pa prolonga bida termina, ta yega tambe un momento cu no ta duna tratamento pa por ehempel reanima un persona mas. E pashent a yega fin di su bida y esaki ta e momento cu cuido palativo ta bira necesario.
Den pasado dokter tabata manda e pashent cas, caminda semper tabata tin un hende ta spera su yegada. Awor tur hende ta traha. Kico ta pasa cu e pashent?
Aki e necesidad pa casnan di cuido pa e pashent terminal ta habri. E caminda pa ultimo momentonan di bida ta bira un paseo di amor.
E entrega total di e voluntario, sigur den e mundo material actual, ta bira rosa den bida di hende cu ta haya e forsa pa sigui cana te final di bida.
Muri, mescos cu biba, ta bira un asunto di calidad humano. Algo sumamente bunita y mariyoso ta pasa den institutonan manera Hospice Atardi, cu merece sosten di henter comunidad pa e contenido cu el a duna na e ultimo parti di bida di hende, cu ta wordo trata cu dignidad di hende pa despues di dignidad di bida, acepta dignidad di morto.
Pa Aruba conoce un futuro nobo, mester di trahadornan, di instancianan, cu ta shock hende na forma positivo. Esaki sigur ta e caso cu Hospice Atardi, caminda solo di bida ta baha pa hende cu hasta den e dolornan di mas profundo na alma y curpa, ta haya reconocimento di hende!
