ORANJESTAD (AAN): Ariba 20 di november na aña 1999 tabata e prome biaha cu un mucha aki na Aruba a tuma un telefon, marca e number 131, y a ricibi informacion, sosten emocional y conseho for di 131.
Ariba dia 20 di november cu tambe ta dia Internacional di derecho di mucha, 131 ta celebra 25 aña di existencia.
Den cuadro di e celebracion di dia Internacional di derecho di mucha y 25 aña di existencia di 131, e celebracion ta cuminsa dialuna 18 di november cu e programa Dance Your Rights.
131 conhuntamente cu Fresh FM ta organisando Dance Your Rights ariba dialuna 18 di movember di 11or di mainta te cu 12or di merdia. Musica semper tin un mensahe incorpora den dje. Durante Dance Your Rights, pa medio di musica lo elabora ariba diferente derecho di mucha. E locutora Angela Tiemens conhuntamente cu 131 y Tienda di Educacion lo ta deleitando e oyente cu musica den cual tin mensahenan di derecho di mucha, y lo ta elaborando extenso ariba e derechonan aki.
Dance Your Rights ta un programa pa duna informacion tocante derecho di mucha na mayor y adulto, y asina fortalece e conocemento di e famia. Na momento cu mayornan tin informacion tocante derecho di mucha, nan por yuda nan yiunan para pa nan mes y desaroya nan mes. Sintonisa awe dialuna 18 di november Fresh FM di 11or di mainta te cu 12or di merdia pa e programa Dance Your Rights.
131 kier a gradici Fresh FM y su otro partnernan cu ta tuma nan impacto social na serio y ta inverti den e muchanan, hobennan y famia aki na Aruba.
