ORANJESTAD (AAN)—Jeanine Tromp, Gender Consulent di CEDEHM (Centro di Desaroyo di Hende Muher),
a haci un invitacion na tur hende homber adulto (18 aña bay ariba), a participa den e charla pa hende homber riba Dia Mundial di Hende Homber, cu e instancia aki ta organizando, Diamars 19 di November awo, titula “Men’s Health”.
Jeanine a reitera cu e charla aki ta hopi importante, pa cuminza haya informacion pa concientiza riba e salud fisico, mental, y emocional. E dama a señala cu, lamentablemente, e ta un barera grandi pa hende homber yega scucha e charla.
“Nos di CEDEHM ta traha conhuntamente cu Telefon pa Hubentud cu tin e programa ‘ The best dad ever’ y mi por bisa cu tur aña nos ta invita hopi hende homber pa yega pa tuma e proyecto aki, cu t’asina importante, cu ta yuda nan como tata, cu ta duna nan tools, y nos no ta haya suficiente tata cu nos lo kier yuda pero nos no ta give up. Nos ta sigui cu e parti aki pa sigui yuda y concientiza e hendenan homber pasobra nos ta wak cu e ta importante”, el a reitera.
El a bisa cu un cas unda tin hende homber cu kier pa su mayornan, su yiunan, su casa ta bon, ta un cas unda tin armonia, pero e mester cuminza pa cuida su mes, pero zorg pa su salud ta bon prome cu e cuida otro.
