Damanan di Sociaal Vormings Traject 1 a yuda decora rotonde di Pos Chikito

ORANJESTAD (AAN): Un biaha mas, e rotonde di Green Corridor na Pos Chikito a bay na encargo di Korps Mariniers Savaneta pa wordo decora e fin di aña aki.

    Y e biaha aki pa por a bin cu e creatividad y habilidad pa traha riba dje, nan a busca yudanza di e artista Ronald Duikersloot y su atelier.

   E damanan di e Sociaal Vorming Traject 1 di Cuerpo di Marinier, a haya un workshop intenso y breve encuanto creatividad.

   Den apenas 1 siman di tempo, nan a kibra cabez, pensa riba idea, pinta, construi, bay pone, y na final a ilumina loke nan a crea.

   E resultado ta un bunita bista y sigur algo di gran honor pa e bunita rotonde di Pos Chikito, cu un biaha mas ta briya yen di splendor, pa duna tur hende un Bon Pasco y tambe Feliz Aña Nobo.