Dama cu a cay riba St. Christoffelberg na Curaçao a wordo rescata cu Helicopter

WILLEMSTAD: Tabata Diasabra merdia banda di 12:20 pm, yamada a drenta na Central di Polis na Curaçao,

cu a mustra cu un dama turista kende a subi e sero di mas halto di Curaçao, esta St. Christoffelberg lo a trompeca, slip, y cay eyriba herida su mes.

   Un unidad di Polis di Barber a wordo manda, y tambe Cuerpo di Bombero a yega na e sero.

   Enberdad e dama turista tabatin golpi na su cabez, na su man, enkel, y tambe rudia.  Sinembargo ta hopi dificil pa baha e dama for di e sero halto ey.  E ora Polis y Bomberonan a dicidi pa check si acaso Guardacosta di Caribe Hulandes lo por yuda cu nan Helicopter.

   E yamada a drenta na Rescue and Coordination Centrum (RCC), cu e peticion pa yuda rescata e dama herida riba e sero.   Sero di St. Christoffelberg tin un altura di 372 meter.

   E Helicopter a lanta vuelo y aunke biento tabata basta modera riba Diasabra, e piloto a sa di controla e aparato, mientras cu asina a hisa y pone e dama herida abordo.

   E ora a bay cune mesora pa Aeropuerto di Hato, unda un Ambulans tabata sperando riba dje pa hibe Hospital.