Dama balente Ingela Lacle logrando e meta di mas di 1000 mata di Mangrove nobo pa e costa di Aruba

ORANJESTAD (AAN): Su nomber ta Ingela Lacle, y e ta un dama mas determina cu nunca pa sigui planta y expande e crecemento di matanan local y mangrove of mangel

riba nan propiedad ademas di promove y motiva otronan por haci esaki tambe na otro partinan di nos isla.

   Aruba Ocean Villas na Savaneta continuamente ta planta matanan nativo enfocando riba Mangelnan cu ta esencial pa nos existencia. Na comienzo e tabata mustra un proyecto hopi ambicioso di Señora Osyth Henriquez, desaroyador y diseñador di Aruba Ocean Villas hunto cu su team di hotel, y awor cu e asistencia y cooperacion di e guru nobo di plantamento na Aruba, Ingela Lacle.

   E meta ta pa planta mas cu 1.000 mata di mangrove pa keda replanta rond na e costa na unda nan por sigui crece den nan propio habitat. Ingela Lacle, ta colectando, replantando, y contando e matanan recien di mangrove planta den potchinan special di bamboo, pa e proyecto aki. Ingela Lacle a expresa di a descubri un total di 4 tipo di Mangroves na Aruba Ocean Villas.

   “Nos ta colecta simiya tur dia pa re-planta den potchinan di bamboo. Pa mi sorpresa mi a discubri cu tin 4 especie di Mangroven na e lugar aki. Tin e popular mangrove cora, cu tin simiya largo, e simiya ta cai den awa y ta keda flota te cu e haya un lugar pa e planta su mes.

   Loke nos ta rescata ta esunan cu ta yega na canto y nos ta replantanan den un tera special cu nos a traha nos mes,” Ingela a bisa. Otro mangrovenan cu a haya ta inclui, mangrove blanco, mangrove preto y e popular fofoti. Tur esakinan ta especienan di Mangrove protehi cu unicamente ta naci den awanan salo.

   Ingela Lacle ta admiti cu e tabata un hende cu ta hopi critico di Aruba Ocean Villas den pasado, y cu e no tabata sigur cu e Mangroves lo tabata den bon estado. Awendia e ta un fanatico di e proyecto aki. E ta bisa yen di entusiasmo: “Manera mi a bula den e investigacion riba e tema di Mangrove aki mi a realisa e gran oportunidad pa promove re-plantacion di Mangrove y trece ideanan padilanti con pa rescata nos propio mangrovenan cu ta hopi esencial pa nos medio ambiente.”

   Ingela tin plannan grandi pa future pa expande e proyecto den actividadnan pa promove replantacion di mangrove y ta spera dip or conta cu involvimento di voluntarionan pa e asuntonan aki. E ta finalisa bisando: “Mi deseo ta pa cada hotel banda di lama of beach purba planta mangrove pa mantene nos beachnan mas sigur como proteccion di nos costa.”

   Aruba Ocean Villas ta traha desde nan inicio cu expertonan internacional den medio ambiente di mundo pa asina por presenta un habitat genuinamente natural pa e bishitantenan (turistanan) por experencia un experiencia unico den nan bida.