ORANJESTAD (AAN)- Dialuna anochi, e campeonato di futbol femenino Copa Aruba Bank Liga Oro 8x8 a continua cu buelta 3 den stadion Frans Figaroa na Noord. Un total di seis ekipo a mira accion e anochi aki.
Den e dos prome weganan cu ta wordo hunga riba mitad veld, Riverplate ta gana Estrella cu e score final di 2 - 0 den un bon wega hopi batayador. E golnan di Riverplate a wordo anota pa Munjeuline Tromp y Jessica Rivero.
Riba e otro tereno, Dakota tambe ta sali victorioso despues di e derota La Fama cu e score minimo di 1 - 0. E gol pa e amariyonan a wordo anota pa Ariadna Valencia. Aki tambe mester menciona cu La Fama a lansa poco bon atake cu variod tiro pero a topa den portero Lyxienne grandi e anochi aki.
Den e ultimo wega cual tabata e clash di e anochi. E ekipo tricolornan di Solito, RCA ta sorprende e Lady Pumanan di Britannia 2 ganando nan cu e score di 2 - 0. E delantero Izaline Angela tabata grandi anotando tur dos gol pa RCA.
E weganan Copa Aruba Bank Liga Oro 8x8 lo continua cu buelta 4 dialuna awor den stadion di Frans Figaroa cu dos wega 7.30 di anochi y un wega 8.45 di anochi.
{gallery}Dakota, Riverplate y RCA victorioso den futbol femenino.{/gallery}
