Paul Eelens, Director di CCOE:
*Dependencia riba tecnologia ta cada bes mas halto
ORANJESTAD (AAN): Paul Eelens, director di Cybersecurity Center of Excellence (CCOE) ta e persona encarga cu e operacion di companianan y tambe e ta yuda y guia e teamnan experto di e centro pa loke ta trata e centro di seguridad operacional, emergency responders team y servicionan di gobernacion.
Eelens a splica cu Cybersecurity Center a lanta pa varios motibo y un di nan ta cu ta wak cu ‘cyber security’ den e ultimo añanan ta bira mas y mas importante pasobra e dependencia riba tecnologia ta cada bes mas halto.
“Un departamento di impuesto no por funciona mas sin IT. Un banco no por funciona mas sin IT, un airport no por funciona mas sin IT, un hospital no por funciona mas sin IT. E no ta djis algo pa yuda automatisa of deshaci di papel. Pero el a bira algo cu ta fundamental”, Eelens a remarca.
Pa salvaguardia y e importancia pa comunidad a lanta un compania cu ta dedica na proteha esaki y pa haci posibel pa uza e ultimo tecnologianan pa e companianan por maneha e risiconan asocia, el a indica y a menciona entre otro, inteligencia artificial, cloud.
Hopi automatisacion por tuma luga, companianan por gosa di dje, pero e ta bin cu risico y p’esey CCOE t’ey pa yuda maneha e risico ey, Paul Eelens a expresa.
El a duna di conoce cu e personanan cu ta traha eynan ta ingenieronan cu a studia hopi aña pa haci e trabao ey. Banda di esaki a enfatisa cu por haci trabaonan pa personanan individual, pero ta purba di duna mas enfoke na e organisacionnan publico y companianan priva, cu ta depende riba IT y cu comunidad ta depende riba e companianan ey diariamente.
