Cunukeronan ta reclamando otro cu ta pone nivel di dam baha demasiado rapido

Confrontacion na Dam di Tanki Flip -- ORANJESTAD (AAN): Na papiamento tin un dicho cu ta bisa, e  mucha no ta bringa pa e kiniki, sino pa e regla di wega.

   Wel a sosode un escenario na e famoso dam di Tanki Flip, caminda un poco mas e situacion por a sali for di man, ora cu persona cu tin su cunucu pega cu e dam, a bay reclama un cunukero cu diariamente ta yega cu su truck pa chica awa di e dam.

   En realidad e awa aki ta gratis pa tur cunukero, pero den su opinion, mirando cu e cunukero asiatico ta chica awa di 4 te 5 biaha pa dia, esaki ta trece un situacion inhusto (‘unfair’) cu ta pone cu cierto momento e cunukero cu tin su cunucu cerca di e dam, su fuse a hera bula.

   Esey a socede, debi cu e cunukero eybanda ta pensando cu e cunukero asiatico ta abusando di e situacion y debi cu e ta chicando e awa asina hopi biaha pa dia, e ta pone cu e nivel di awa den dam ta bahando demasiado lihe, cu e posibilidad cu e awa ta caba y lo bira un problema serio pa e cunukeronan eybanda, cu tambe ta usa e awa aki pa nan plantacion.

  Nan ta opina esey, djis basa riba e grandura di e tanki y e truck cu e cunukero asiatico ta usa pa recoge awa.

   Esey ta un indicacion fuerte tambe cu e cunukero asiatico aki no ta chica e awa pa su cunuco so, sino ta parce cu e lo ta haciendo negoshi cu e awa.  Ya caba informacion a circula cu e cunukero asiatico ta worde bendi na 10 cent pa liter, pues si e truck ta carga 6.000 liter di awa y ta chica 5 biaha pa dia, ta 30.000 liter di awa e ta bay cune tur dia y si bo converti esey na Florin, ta basta placa tin envolvi den e negoshi aki pa dia.

   No ta conoci kico a pasa, pero un poco rato despues cu e cunukero asiatico a caba di chica awa na e dam, a bin un tractor tipo backoe y a cera e caminda cu ta worde uza pa bay na e dam.