E Arubiano ta di importancia mayor den e creacion di su pais
*E base legal di e pais mester a proteha caracter propio di Pueblo
*Identidad Arubano mester a wordo sirbi den entidadnan Arubano
ORANJESTAD(AAN)—Kico ta un pais? Kico ta un nacion? Esaki ta e preguntanan basico den e realisacion di Status Aparte, cu manera DIARIO a splica anteriormente, mester a enrtrega e base no solamente pa libertad, pero na prome lugar reconocimento di e identidad propio di e Arubiano y e defensa directo di su bienestar.
Den buskeda di e berdad di situacionnan cu a wordo crea pa Arubianonan den historia ta topa, cu un falta di respet pa e Arubiano hasta na Aruba mes.
Ora bolbe den e historia, ta topa hasta cu humiliacion di e Arubiano na su propio pais.
Na e momento cu a cuminsa papia di autonomia politico, mester a cuminsa papia di e dignidad personal di e Arubiano y e respet y sosten cu e mester a goza na Aruba, cu mester tabata centro di respet pa e cultura, e base historico di e Arubiano.
E identidad Arubano mester a bira central den e pakete di balornan, cu ta e base moral di e pais, cu respet pa cultura di Aruba, cu su propio idioma Papiamento cu pa motibo atrobe di su historia, ta diferente for di e Papiamentu di e otro islanan ABC den Reino.
Esaki a haci cu mientras e parti di leynan estatal tabata wordo atende, hunto cu formulanan financiero cu mester a garantiza e sosten material di un estado, mester a lucha pa mantencion di e base cultural y moral di e Arubiano, cu ta central di e aceptacion legitimo di un pais.
Ta den e pakete aki, ta topa cu e ingredientenan no material di e lucha di Status Aparte, cu a exigi orguyo di ta Arubiano y entrega na e lucha di e pais pa reconocemento di su propio identidad.
Ora papia di Status Aparte, ta papia di un situacion cu ta regla estado legal di e pais forma pa hende, loke ta exigi como punto central, e base di e bienestar di e hende, ta percura pa economia y asuntonan financiero cu mester sostene pues e bienestar di e hende.
Esencial den e lucha pa Status Aparte ta topa cu e lucha pa reconoce oficialmente e idioma Papiamento, e cultura, e platonan, e ofishinan, e costumbernan y balornan y tur loke ta e parti no material di un ser humano, cu tin e libertad pa ta su mes na su propio pais y no wordo discrimina dor di cualkier poder of opresion di exterior.
Pues mientras tabata traha riba Leynan, e Pueblo di Aruba mester a ricibi e reconocemento basico como alma di e pais.
Den esaki awor ta bini dilanti e persona di Betico Croes como lider pero manteniendo su status di Arubiano y a base di normanan Arubano pa sirbi su Pueblo a base di dignidad y respet pa su pais y su Pueblo.
Como dirigente politico di Aruba, Betico Croes a keda semper un parti integral di Aruba, promoviendo e cultura, e moral pues e fundeshi di comunidad humano, Arubano.
Tradicionnan Arubano a ricibi sosten directo di Betico Croes, cu su grupo di Dande entre otro y su participacion directo na e bida diario di e Arubiano segun normanan Arubano.
E idioma di Aruba a haya reconocemiento oficial. Respet pa e base cultural y moral di Aruba a wordo establece den e crecemento economico, financiero, social, cultural di e pais na caminda pa Status Aparte pa asina evita cu necesidad of debe, lo a habri porta pa e humiliacion di e Arubiano.
Un pais a nace for di e alma autentico Arubano y ta den esaki Aruba a proclama Betico Croes como su lider, pasobra el a hiba un lucha cu a hiba su persona na e nivelnan estatal mas halto, pero manteniendo su identidad di Arubiano.
Pues ora papia di Status Aparte no ta papia solamente di asuntonan legal, financiero, economico, pero pa papia di felicidad y libertad di e Pueblo ta papia di Status Aparte como reconocemento di e identidad unico di Aruba como pais y nacion di e Arubiano, cu mester a wordo sirbi cu e economia cu den e lucha di Status Aparte a wordo diversifica y amplia, y e poder financiero di e pais, pa defende su propio moneda y situacion financiero pa garantiza cu tin fondonan disponibel pa asegura e bienestar di e Arubiano.
