"Biblioteca ta mas cu buki"...
ORANJESTAD (AAN): Un aña nobo a habri y Biblioteca Nacional Aruba a habri aña caba cu un tremendo actividad. E actividad cu ta papia pa su mes tabata carga e nomber 'Pa un bon comienso di aña'. Esaki tabata un anochi di musica y canto cu a encera un homenahe na Trio Los Arubeños pa nan 60 aña di existencia y tambe na Sr. Maiky Croes.
Esaki a resulta den un tremendo actividad. E sala tabata yen yen y te pafo tabatin hende, asina Yosmar Maduro-Sneek, hefe suplente di BNA a indica.
El a splica cu esaki ta un proyecto cu Sr. Mirto Lacle y su casa a haci hunto cu Biblioteca Nacional. E ta e prome actividad di biblioteca.
Maduro -Sneek a sigui bisa cu nan tin proyectonan of actividadnan hopi interesante e aña aki pa comunidad. Ya caba pa dia 23 di januari y dia 30 di januari ta bay tin presentacion di dos buki. Tur hende ta bonbini, a bisa.
Esnan cu ta interesa den mas informacion por bishita e website di BNA y wak e actividadnan cu tin pasobra eynan ta wordo publica di antemano.
Banda di esey tin diferente actividad cu por ta di biblioteca mes of di otro grupo of persona. Den transcurso di aña hopi actividad tin y cu BNA ta wordo acerca pa haci uzo di e salanan, el a indica.
Mas y mas mirando e importancia cu Biblioteca Nacional tin den comunidad como un plataforma of un trampolin educativo y tambe cultural. "Biblioteca ta mas cu buki", Yosmar a expresa, pasobra hopi hende ta pensa cu biblioteca tin di haber cu buki so. No, e ta mas cu esey. Pero si bo no ta wordo poni na altura y bo no sa unda pa busca informacion, berdad bo no lo sa, el a agrega.
El a laga sa cu den e ultimo añanan tin hopi peticion di gruponan cu kier haya un rondleiding den biblioteca. E ora nan ta haya sa kico tur biblioteca tin pa ofrece y pa haci. Pero si bo no a hacie bo no sa.
Ta trata di servicionan cu BNA ta duna. Por ehempel exposicion. Ta haya hopi peticion pa exposicion. Ya caba januari ta full gebook. Tambe februari, maart. Te hasta october ta gebook, a bisa. For di inicio di aña hende ta pidi e luga pa e exposicion of pa nan actividad, Yosmar Maduro-Sneek a duna di conoce.
