Departamento di Salud Publico
ORANJESTAD (AAN): Den cuadro di Dia Nacional pa Cuida Aruba, Gobierno hunto Departamento di Salud Publico ta haci un yamada na tur participante pa proteha nan salud y siguridad durante e actividadnan di limpiesa. Haci nos isla limpi ta un responsabilidad comparti, pero ta importante pa haci esaki di un manera consciente y sigur. Pa evita deshidratacion, herida, picadura di insecto y otro incidente, Departamento di Salud Publico ta comparti e siguiente recomendacion:
- Proteha bo mes contra solo
Uza protector solar cu SPF 35 of mas y no lubida di reaplica regularmente. Bisti un pechi y paña fresco di color cla cu manga largo y pantalon largo pa proteha bo cuero contra solo.
- Preveni deshidratacion
Bebe awa regularmente, hasta si bo no tin sed. Evita exceso di bebida cu cafeina, hopi sucu of alcohol, ya cu esakinan por contribui na deshidratacion.
- Proteha bo mes contra picadura di insecto
Uza repelente y bisti paña cu ta cubri bo brasa y pia. Keda alerta pa animal y insecto cu por ta scondi den of bou di desperdicio, yerba y otro material.
- Preveni accidente
Uza handschoen resistente y safety boots pa proteha bo man y pia. Nunca recoge glas, metal, obheto skerpi ni otro tipo di desperdicio directamente cu bo man.
- Proteha bo wowonan
Uza bril di siguridad ora tin stof, glas, rama of particula cu por bula y causa daño na bo wowonan.
- Carga material di forma sigur
Ora bo ta hisa un obheto, dobla bo rudianan y tene bo lomba stret. Evita obheto cu ta muchu pisa y pidi yudansa ora ta necesario.
- Cuida bo higiene
No mishi cu bo cara, come ni bebe cu handschoen sushi. Despues di e actividad, laba bo man bon cu awa y habon.
- Actua corectamente den caso di herida
Para di traha inmediatamente si bo haya un herida. Haci e herida limpi cu awa y busca prome auxilio of asistencia medico si ta necesario.
Departamento di Salud Publico ta recorda tur participante cu prevencion y bon preparacion ta esencial pa haci e actividad di limpiesa un experiencia positivo y sigur. Cuida bo salud durante Dia Nacional pa Cuida Aruba. Limpia cu responsabilidad, proteha bo mes y proteha otro.
Dia Nacional pa Cuida Aruba
Dia Nacional pa Cuida Aruba ta un iniciativa di Gobierno di Aruba cu ta busca fortalece e responsabilidad comparti den cuido di nos isla. Bou di e lema “P’ami. P’abo. Pa nos tur.”, e campaña ta invita ciudadano, empresa, scol, club, fundacion y organisacion pa uni forsa durante un gran accion nacional di limpiesa riba diasabra 25 di juli.
Ademas di haci diferente area rond Aruba limpi, e iniciativa tin como meta crea mas conscientisacion cu cuido di nos entorno ta responsabilidad di nos tur. Un Aruba limpi y bon cuida ta cuminsa cu compromiso y accion di cada ciudadano.
