Ministro Geoffrey Wever:
ORANJESTAD (AAN): Despues cu na luna di juni 2025 Minister di Finansa, Asunto Economico y Sector Primario Mr. Geoffrey Wever a entrega e Cuenta Anual 2021 di Pais Aruba na Contraloria General (‘Algemene Rekenkamer’), awo riba Dialuna 7 di juli Minister Wever ta entrega e Cuenta Anual 2022 na Contraloria General. Esaki den cuadro di transparencia di e proceso legislativo pa responsabilisa entrada y gasto di Pais Aruba.
Contraloria General ta encarga cu investigacion riba efectividad y legitimidad di entrada y gasto di Pais Aruba segun e Constitucion di Aruba. Durante nan investigacion riba legitimidad, Contraloria General ta investiga si e cuentanan di entrada y gasto mescos cu Cuenta Anual 2021 awor Cuenta Anual 2022.
E Cuenta Annual ta contene tur post cu segun regla mester aparece den nan y/of si e cuentanan ta redacta conforme e proceduranan legal y ley di presupuesto. Manera ta conoci e proceduranan aki ta stipula den ley di Contabilidad 1989 (Compabiliteitsverordening V 1989) cu ta stipula e forma pa maneha y responsabilisa placa di Pais Aruba. Contraloria General ta averigua si un decision di maneho a logra e obhetivo (eficacia) cu menos uzo posibel di e recursonan (eficiencia) den 2022.
Como parti di e proceso legislativo pa responsabilisa entrada y gasto di Pais Aruba, Contraloria General lo publica un rapport di e investigacion haci y lo duna conclusionnan riba efectividad y legitimidad di entrada y gasto di Pais Aruba. Asina aki Algemene Rekenkamer ta haci recomendacionnan cu e meta pa mehora finansa publico y reforsa e supervision financiero riba Pais Aruba.
Minister Geoffrey Wever ta gradici Departamento di Finansa y Centrale Accountantsdienst pa e trabao haci pa den un temporada record di keda cla cu Cuenta Anual 2021 luna pasa y awor Cuenta Annual 2022 pa asina disminui e retraso di entrega di cuentanan anual di Pais Aruba. Un danki tambe na Algemene Rekenkamer cu tin un rol constitucional pa mehora finansa publico di Aruba.
