Cuater fundacion cu ta bataya cancer ta organiza 5 dia di charla importante den diferente bario

ORANJESTAD (AAN): Diaranzon a tuma lugar un conferencia di prensa organiza pa Stichting BOB, Koningin Wilhelmina Fonds,

Fundacion Contra Cancer di  Prostaat(FCCP) y Mary Joan Foundation, relaciona cu un concepto nobo cu ta encera 5 charla informativo.

Diantha Nuesch di Stichting BOB a trece dilanti cu e charlanan ta pa concientiza pueblo di Aruba tocante salud en general y prevencion.

“E cinco charlanan aki ta wordo organiza pa 4 diferente fundacion cu ta uni den e causa di prevencion y concientizacion”.

Nos kier demostra cu nos ta para hunto y cu nos tey pa pueblo di Aruba, segun Nuesch.

E prome charla ta bay ta riba 20 di September na Teresita Center na San Nicolas, sigui pa e di dos charla riba 18 di October na MFA Santa Cruz.

E di tres charla ta bay tuma lugar na MFA Paradera riba 22 di November, e di 4 ta bay ta riba 12 di Februari di 2024 na MFA Noord, mientras cu e di 5 charla lo tuma lugar riba 20 di Maart na Dakota.

Cada charla ta den otro bario, pa asina mas hende posibel por haya un chens di bay.

E entrada ta completamente gratis y ta bay tin koffie y te pa tur hende.

Durante e charlanan lo duna un splicacion riba e diferente fundacion y organizacionnan envolvi, mientras cu lo duna informacion valioso y hermentnan cu por uza na cas tambe.

Nuesch a bisa cu ta importante pa hende haci testnan medico y no warda te ora cu por ehempel nan haya un invitacion.

Di e manera aki bo por traha bon riba prevencion di cualkier enfermedad.

Milo Croes, presidente di FCCP a hiba palabra tambe durante e conferencia di prensa y el a bisa cu e tarea di FCCP ta pa informa hendenan homber cu nan tin cu tuma accion.

“Nos meta ta pa yuda e hendenan homber tuma e decision pa prome cu nan sinti algo robez bishita nan docter di cas, sigur si nan a pasa edad di 40”, segun Croes, kende a indica cu hendenan mas hoben ta hayando cancer di prostaat.

El a splica cu mas trempan bo haci un control, menos chens bo tin di haya un cancer maligno.

“Hendenan homber ta cobarde y pesey nos kier stimula nan pa bay haci un examen”.

Tambe ta asina cu hopi hende ariba di 60 aña no ta bay check y si nan check y resulta cu nan tin cancer, hopi no kier tuma tratamento, segun Croes.

Pesey e presidente di FCCP ta pidi hende di tur edad bishita e charlanan, pa haya mas informacion valioso riba nan salud.