CUA no a discuti ainda riba aumento di salario minimo, pero e subida ta pa haci politica cu ne  

Frans Ponson, presidente CUA:

ORANJESTAD (AAN) Presidente di CUA (Comerciantenan Uni Aruba), señor Frans Ponson, den entrevista cu DIARIO el a indica cu nan no a discuti ainda tocante e tema di salario minimo, pero subi salario minimo cu 15%, den su parecer esaki ta haci politica cu ne.

   “Esaki ta loke personalmente Frans Ponson ta bisa” el a expresa, agregando cu mucho comentario CUA no tin riba dje.

   “Bo por hisa salario minimo cu 10 mil florin mañan, pa un comerciante e no ta haci mucho diferencia, pueblo sa kico nos ta bay haci!”, Ponson a vocifera.

El a reitera cu esaki ta algo politico y CUA ta lague pa e politiconan pa wak kico nan ta haci.

   “Ora nan bin cu ley, mañan nan ta bin cu BTW 50% kico e comerciante ta bay haci? Mi tin cu cobra e 50% y duna gobierno bek”, Ponson a señala.

   “Politikeria nos ta laga pa nan, nos ta djis atende cu loke nan ta bisa pa haci nos ta haci, pero pueblo tambe, cu tin un tiki mente sa kico ta bay pasa cu esey. Si mañan BBO ta bay 30%, pueblo sa ken ta bay paga esaki. Despues nos ta grita bek cu cosnan ta caro, pero cosnan ta caro door di e reglanan cu gobierno ta buta. Si nos kita BBO mañan tambe prijs ta baha”, Frans Ponson a remarca.