Diego de Cuba, lider di STA:
ORANJESTAD (AAN) E lider di Sindicato Trahadornan Arubiano (STA), Diego de Cuba, a sigui splica den entrevista cu DIARIO, tocante e CAO nobo pa empleadonan di Tierra del Sol, cu e hecho cu nan ta pasa di 45 pa 40 ora laboral, tin cierto implicacion, pero cu ta un plus pa Aruba.
“Esaki ta implica cu e compania ta bay haya su mes den tuma mas hende den servicio, loke ta un plus pa Aruba tambe, pasobra hopi hende lo haya trabao. Anto, automaticamente, locual cu nan ta ganando na ora, lo conoce un aumento; pasobra locual tabata wordo dividi den 45 ora awo e ta wordo dividi den 40, claro e ta bira mas hopi. Anto, esey ta un plus tambe, pero mi ta kere cu e negociacionnan a bay den bon ambiente toch, un discusion aki, aya nunca ta falta, y e tarea di e sindicatonan ta pa convence e Gerencianan di e companianan, y den e caso aki hunto cu e delegadonan, nos a logra convence e Gerencia cu nos ta kere cu esaki ta e miho caminda pa nos bay”, Diego de Cuba a expresa.
E a agrega cu e Gerencia a bay delibera den nan seno y nan a realiza cu STA tin razon.
“Iberostar ta un compania grandi, tin varios hotel aki riba, nan tin cu alinea practicamente tur nan companianan riba e mesun nivel, anto nos a bisa nan cu ta un tremendo idea si nan por logra esey, pero nan no mester lubida cu Tierra del Sol ta un compania cu mas di 20 aña di existencia, dus mester tene cuenta cu trahadornan tin akiden tin 23, 25 aña di servicio y mi ta bisa semper: reconoce bo hendenan”, Diego de Cuba a conclui.
