Cu serie “Tecnica di Piscamento” Rhona Lemminga ta honra e arte di piscamento y e trabao di piscado

Cu imagen di Arthur Giel riba su diseño di stampia:

ORANJESTAD (AAN) – Den un entrevista cu e artista Rhona Lemminga, cu a produci e serie di stampia Tecnicanan di piscamento, dentro di e emision 2021, el a duna di conoce cu e ta diseña stampia ya pa 20 aña caba.

Durante e trayecto aki el a traha diferente serie y esaki ta algo cu poco hende na Aruba sa, cu artistanan local ta haci. E ta un trabao artistico cu nan tin cu pone nan interes den dje, haci research y como cu su casa gusta pisca, ya e tin un tiki conocemento di piscamento, anto el a pinta meneer Giel. Locual a interese hopi ta e buniteza cu Aruba tin den lama, con e colornan ta combina cu otro, y esey el a purba di trece den e prome dia di emision, y den su stampianan.

El a splica cu, como artista, nan tin cu diseña e temanan cu nan ta pidi nan, e envelop y tambe e stempelnan. E stampianan ta wordo pinta na man na cierto grandura, y ta wordo entrega na Post Aruba y di akinan nan ta bay Hulanda unda nan ta hacie manera mester ta, pa bira stampia chikito. E ta tuma su tempo pa hacie, y e ta algo hopi artistico, Lemminga a reitera, agregando cu e ta haya importante pa e Arubianonan sa cu nan por colecciona stampianan pasobra ta un arte nacional, traha door di artistanan local, y nan ta wordo manda pa henter mundo. El a manda un mensahe pa pueblo, pa aprecia e talento local y pasa cumpra e stampianan y colecciona nan, pasobra tin hopi.

El a menciona cu e gusta mas ora e haya un carchi cu su stampia pa e temporada di Pasco, cu si e ta haya algo via WhatsApp, Facebook of email, y esnan bibando afo ta gusta hopi di haya carchi cu stampia di Aruba. E ta haya cu ricibi un carchi ta algo bunita.

Tambe DIARIO a combersa cu e piscado Arthur Giel, ken a conta cu e ta un piscado di hopi aña y su abuelo a hibe pisca cu su seis aña di edad; el a caba scol y a keda pisca. Giel a menciona cu el a wordo busca hopi biaha pa ATA pa nan uza su imagen, y el a haci masha propaganda, entrevista, video y awo e ta riba stampia di Aruba, loke ta nifica cu su trabao ta wordo balora.

E ta algo hopi bunita cu Rhona Lemminga, atravez di su diseño di stampia Tecnicanan di Piscamento, ta honra e arti di piscamento y e piscado.