Cu man habri Kiviti a ricibi bishita di Prome Minister Eman

Accion di Bario a sigui

ORANJESTAD (AAN): Durante siman den oranan di mainta, a tuma lugar recorido den bario di Kiviti, esaki en conexion cu e Accion di Bario cu ta tuma luga tur siman. Prome Minister mr. Mike Eman acompaña cu diferente instancia y departamento, como tambe coordinadornan social encarca cu e proyecto, a drenta e bario y asina  atende cu e habitantenan y nan necesidad.

   E compleho di cas social di Kiviti situa na San Nicolas (area pabao di Palisiaweg) ta den su mayoria habita pa adulto mayor, hende grandi cu ta depende di entrada di pensioen. Durante e bishita den bario a tuma nota di ayudo cu e vecindario ta duna otro.

   Nos a haya oportunidad di combersa cu Nahasha Richardson y señora Zara Cabrera cu actualmente ta recuperando di su salud. A pasa den reto y ta gradecido na e bisiñanan cu a brinde yudansa durante e tempo dificil.

   Despues di un stoke, Zara ta recuperando poco poco pero no por a keda sin menciona y gradici e bunita gesto di Nahasha, cu a presenta na su cas y cu tur su curason a brinda su ayudo na señora Zara den su recuperacion.  “E ta sali di su curason” ta locual cu señora Zara a expresa.

   Nahasha Richardson a comparti su pensamento cu, si bo yuda un otro despues cualkier dia otro tambe lo yuda bo. E ta consciente cu señora Zara su salud no lo duna pa cuida pa su mes, e lo tin dificultad pa haci hopi cos riba su mes. Su mayornan a lante asina y Nahasha a yuda su prohimo na e momento cu e yamada a yega.

   Actualmente Nahasha ta atende Iglesia Vida Abundante cu tambe ta inculca e balornan aki den cada hoben y/of miembro di nan Iglesia. E ta importante pa yuda nos hende grandinan, como cu un dia nos tambe lo yega e edad aki y locual bo a entrega den bida bo lo haya bek ora bo ta mas grandi.

Ayudo cu e aumento di pensioen tambe sigur tabata un alivio pa señora Zara, cu ta haci bon uzo di dje. Nahasha tambe a mira e nececidad cu hopi ta pasa aden den e area di Kiviti, tin algun cu cuminda no ta yega, paña y asina tin cu falta di ayudo diario pa nan por biba digno. Optimista cu presencia di Minister President den bario, como cu esey nificia ayudo social pa hopi den e area di Kiviti. “Fe ta grandi cu e si lo yuda nan”, ta locual Nahasha a bisa.

   Cu presencia di DOW, Serlimar y demas departamento a logra limpiesa di e bario, diferente cura y area recogi pa asina laga Kiviti mustra limpi.

   Prome Minister Mike Eman ta anuncia tambe diabierna awo e raspaso oficial di casnan social di FCCA na cada propietario cu pa hopi aña tabata pega cu esaki. Hopi ta esnan cu pa añas tabata desapunta, despues cu ora a logra finalisa pago completo di e huurkoop, no por a logra e traspaso di e propiedad riba nan nomber locual tabata crea frustracion pa e doñonan.

   A haci un compromiso y Prome Minister a cumpli. A indica cu prome cu fin di aña lo entrega /traspasa cada vivienda na su propietarionan, a ahilisa e proceso, a mobilisa e departamento y diabierna esaki ta bira un realidad.

   Den Kiviti a papia tambe cu señora Rosabella Koolman di 90 aña, riba e aumento di 250 Florin cu el a ricibi riba su pensioen. Masha contento y poniendo esaki un banda pa asina ora e momento yega e mes por paga pa su entiero.

   Esaki ta un preocupacion cu hopi adulto mayor ta carga den nan curason. Nan no kier bira un molester financiero pa nan yiunan y ta busca di tur manera pa regla nan mes un entiero. Ademas señora Koolman su deseo ta di wordo dera y no crema.   “Kima mi no ta bay, den ley di Dios no tin kimamento”, ta locual el a expresa.

   E ta mira cu hopi pensionado ta contento cu e aumento cu nan a ricibi, el a yuda mirando e costo di bida cu a subi durante ultimo añanan. Personalmente e ta pone su placa den un sam pa asina e por mira su entiero cubri. Cu presencia di Prome Minister den bario, e ta spera cu e biaha aki si e por haya ayudo y no manera e otro gobierno cu a pasa y nunca mas a bin bek.