Crusero ‘Mariner of the Seas’ tey awe yena cu fanaticonan di Star Trek abordo

Tin varios artista tambe abordo

ORANJESTAD (AAN): E barco crusero “Mariner of the Seas” di Royal Caribbean International cu awe Dialuna lo drenta pa 7:00 am, lo bay ta yena cu hendenan cu ta ser yama ‘Trekkies’, pues fanaticonan del alma di e popular serie y peliculanan di Star Trek.

   E viahe aki a wordo organiza special pa e amantenan di Star Trek, y ta e di siete anual.  E ta ser yama ‘Star Trek Cruise”, y ta un biahe di 7 dia den Caribe.

   Semper un Star Trek Cruise ta bin c nan mesun capitan, y e aña aki ta Sonequa Martin-Green, kende a duna tur hende bon bini ora nan tabata aborda e crusero.  Varios artista di Star Trek ta abordo, incluyendo Walter Koenig (di e serie original na TV), y di episodionan di Star Trek: The Next Generation tin Wil Wheaton, Brent Spiner, Gates McFadden, LeVar Burton, John de Lancie, y Denise Crosby. 

   Di Star Trek Deep Space Nine lo tin actornan Nana Visitor, Armin Shimerman, Max Grodénchick, y Chase Masterson.  Di Star Trek Voyager tin Robert Picardo y Garrett Wang.  Di Star Trek Enterprise tin John Billingsley, Connor Trinneer, Anthony Montgomery, y Dominic Keating.  Di Star Trek Discovery tin Doug Jones, Anthony Rapp, David Ajala, y Mary Chieffo.  Di Star Trek Picard tin Michelle Hurd, Ed Speelers, Todd Stashwick, y Peyton List.  Di Star Trek Lower Decks tin Tawny Newsome, Eugene Cordero, y Gabrielle Ruiz.

   El a sali Diahuebs atardi for di Port Canaveral na Florida, y e barco a wordo decora cu tur cos cu tin di haber cu Star Trek.  Durante e viahe lo bay tin algo pa tur hende por goza di dje, sea si ta un amante di pelicula cu lo prefera di keda den piscina y mira peliculanan Star Trek riba pantaya grandi, of esnan cu ta interesa di siña mas di e universo grandi cu tin rond di nos.

   E pasaheronan lo participa den diferente evento manera hersengymnastiek, karaoke, y lo tin un welcome show cu Brent Spiner y LeVar Burton, actividad rond di piscina cu tur hende bisti cu T-shirt geel di Star Trek (potret saca Diasabra), y tambe lo bay tin un fiesta cu tema di Gorn Warp Party, y un presentacion anochi di un pelicula bao strea, yama ‘Star Trek 2009’.

   E barco a nabega pa dos dia, y Diadomingo tabata di bishita na Curaçao.  Awe Dialuna e barco lo tey for di 7:00 am te cu 4:00 pm.  Asina e lo sali bek pa yega Diahuebs 29 di Februari atrobe na Port Canaveral pa nan baha.