Maltempo a stroba nan di bay Cayman Islands
ORANJESTAD (AAN): Segun e lista oficial di Aruba Ports Authority, riba Diamars 1 di October 2024, nan tabata sperando solamente bishita di e barco crusero Carnival Horizon na Aruba cu ta drenta 9:00 am.
Sinembargo a ricibi peticion di Celebrity Cruises pa mira si Aruba por ricibi un barco di nan cu ta riba un viahe largo di 15 dia, for di Los Angeles (California) te Fort Lauderdale (Florida).
E barco a sali desde 19 di September di California, y sin problema a pasa bishita e.o. Puerto Vallarta (Mexico), Huatulco (Mexico), Puntarenas (Costa Rica). Diasabra nan a pasa henter atardi y anochi trempan ta cruzando Canal di Panama.
Ora cu a drenta Lama Caribe, a bin topa cu basta maltempo den e area, pero e Capitan a move rapido y Diadomingo a mara pa asina pasaheronan por a bishita Cartagena (Colombia).
Pero e disturbio fuerte cu tin den parti noordwest di Lama Caribe a mustra cu si nan sali rumbo pa Cayman Islands (cu ta nan destinacion original), nan lo bay confronta hopi mal tempo, cu olanan bruto. Asina pues e compania a escoge pa viaha pa Aruba.
E barco a yega Aruba riba Diamars mainta pa 7:10 am. Awe nan lo ta riba lama, y mañan tambe pa asina yega Diabierna mainta na nan puerto final na Fort Lauderdale.
Tin di nota cu e welga grandi di trahadornan na Waf di Miami y tambe Waf di Fort Lauderdale cu a start Diamars, no ta afectando barconan crusero. Sindicato di Trahadornan mes a dicidi cu nan lo sigui atende cruseronan, y tambe lo atende tur asunto di barconan Militar y di US Coast Guard.
