Rocco Tjon:
ORANJESTAD (AAN): Comision Trafico Sigur di Ministerio di Husticia y Asuntonan Social ta lansa su prome Encuensta Nacional tocante Siguridad den Trafico.
Via e relato aki, un suplica ta worde haci na henter nos comunidad pa activamente participa na e encuensta aki. Opinion y experiencia di cada persona ta conta y por contribui na cambionan den maneho pa yuda mehora siguridad den trafico.
Hasta personanan cu a pasa den accidente durante di e ultimo 3 aña ta worde pidi pa comparti nan experiencia. E encuesta aki lo tuma luga Online pero tambe lo tin encuentro cu comunidad. Ademas di e encuesta, un Focus group cu stakeholders lo worde organiza pa asina scucha sectornan relaciona cu trafico.
Debi na e cantidad di accident cu por worde preveni ta keda halto, esaki ta mustra e necesidad urgente pa mehora siguridad riba nos careteranan. Comision Trafico Sigur for di inicio ta convenci cu e participacion di e comunidad ta esencial pa desaroya solucionnan efectivo pa e retonan actual riba caminda di Aruba. Cu e encuesta aki, Comision Trafico Sigur kier tin un bista amplio di con sigur comunidad ta sinti riba caminda y tambe pa identifica areanan cu por worde mehora.
Con pa Participa: E encuesta ta habri pa tur residente y usuario di trafico di Aruba, sea ta automobilista, motociclista, ciclista, peaton etc.. Participante mester ta biba na Aruba y tin un edad di minimo 18 aña pa comparti su opinion. Pa participa por bay na e website:
traficosigur.aw/survey
Aki ta scoge bo idioma preferi (papiamento of ingles). E encuesta tin un duracion di entre 5-7minuut y ta anonimo y confidencial.
Pa esnan cu kier participa pa gana premio, lo tin regalo como 1 aña di seguro pa auto, 1 aña number di auto, y bon pa gasolin of diesel. Esaki ta opcional, pero si bo kier participa pa gana, mester registra bo nomber y email.
Participa na e encuesta y contribui pa un trafico mas sigur. Salba bida, Scoge pa Seguridad.
