ORANJESTAD (AAN): Rond mundo, y tambe na Aruba por a nota con Diasabra anochi un monton di hende a keda desapunta sin cu nan por a mira e tan spera concierto yama “Marc Anthony Una Noche”, pa cual hopi di nan a paga $30 pa
por mire. Otronan a acudi na negoshinan local cu a paga pa pasa esaki riba pantaya grandi.
Pero tur hende a keda cu gana! Pasobra e concierto via livestream riba Internet a demostra pakico keto bay un concierto transmiti cu señal di video via satelite lo ta keto bay mihor cu tur otro cos.
Diasabra anochi, e plannan di Marc Anthony y su promotornan a keda pega y ehecutivonan tabata furioso. Pasobra debi na demasiado demanda di publico, esaki a pone cu henter e plataforma di streaming a colapsa. Esey ta algo cu Marc Anthony mes a laga sa despues.
“Una Noche” mester a stream riba e plataforma di Maestro, cu ta e mesun cu a sostene shownan di Billie Eilish y TimMcGraw na 2020.
Pero e plataforma Maestro no a realiza cu e demanda pa Marc Anthony lo bin for di rond mundo. Simplemente nan network no tabata capaz pa wanta asina hopi peticion pareu cu ta drenta via Internet pa hendenan log-in.
E concierto mester a cuminza Diasabra anochi pa 8:00 pm (ora di Aruba), y el a wordo promovi mundialmente, y di adelanta caba fanaticonan for di rond di Latino America y mundo a cumpra ticket pa e livestream. E concierto aki mester a bira e unico evento livestream y unico presentacion en vivo di e cantante aki desde cu e pandemia a cuminza.
E anochi aki, Daddy Yankee tabata poni pa aparece den e concierto como Gueststar.
Pero for di trempan caba a cuminza nota cu cos no ta bay bon. Fanaticonan cu a paga adelanta a haya un code, y ora di log-in ta hinca e code aki, y e server ta contesta nan cu “code incorecto”.
Na Aruba tambe, hopi hende a cuminza haya stress como cu nan no por drenta. Despues di un ora, pues pa banda di 9:00 pm, keto bay e sistema tabata keda sin laga e clientenan drenta y mira e show.
E negoshi local cu a ofrece un evento den aire libre pa mira e Concierto aki, tabata wak holoshi ta bati y 9:00 pm ta yega, cu ta e horario cu tur empresa tin di cera nan porta na Aruba.
Pa 9:30 pm, keto bay nada di show y pa e momento ey e cantidad di hendenan furioso riba Twitter pa reclama e cos aki, a cuminza trend rond mundo. Asina a bin compronde cu ta for di rond mundo tin problema.
Diripiente Marc Anthony mes a duna un contesta riba social media, bisando cu “E concierto no a cuminza ainda. Nos ta experienciando un retrazo cu Maestro, cu ta e plataforma di streaming,” e cantante a skirbi.
Asina e sistema a keda, down, y ningun hende por a log in. Tur esnan cu a kere cu nan lo a goza un anochi na cas di e concierto, a keda sin mira nada.
Te Diadomingo madruga pa 1:30 am, Marc Anthony a emiti un declaracion completo riba su social media, gradiciendo tur esnan cu a cumpra ticket, y a pidi disculpa pa e fayo tecnico, y a sigura fanaticonan cu nan lo bay haya chens di mira e show toch.
“Mi ta haciendo tur cos den mi poder pa percura cu hendenan cu a gasta nan placa cu nan ta gana cu tur sudor pe, lo hay ae chens pa mira e show lo mas pronto posible, y nos lo coregi tur cos pa boso,” el a skirbi.
