ORANJESTAD (AAN): Recientemente Banco di Caribe a haci un donacion na Fundacion Contra Violencia Relacional (FCVR). E fundacion aki antes tabata conoci bou di e nomber di Fundacion pa Hende Muhe den dificultad y recientemente a
cambia esaki. Banco di Caribe a haci entrega di un suma di Awg. 2500 na e fundacion aki, di manera cu nan por sigui cu e bon trabou cu nan a bin ta haciendo.
Banco di Caribe ta sostene e esfuersonan di e fundacion cu ta traha incansablemente pa conscientisa y proteha victimanan di violencia den seno familiar. Cambiando di nomber, nan ta aun mas cerca di e famia Arubano.
Tocante Fundacion Contra Violencia Relacional (FCVR)
Ta ofrece ayudo na e famia completo cu ta experencia violencia relacional. Mucha ta forma 17% di e clientenan. Antes un yiu cu experiencia violencia relacional tabata wordo considera como victima secundario, pero awor por conclui cu violencia relacional tin efecto directo riba un mucha. Por ehempel, ora yiu ta purba para e pelea entre su mayornan.
FCVR ta para pa igualdad y esey ta nifica cu no ta discrimina ni edad ni sexo. Tin Hende homber cu tambe por ta victima di violencia relacional; nan ta forma 3% di e clientenan. E enfoke ta keda riba e hende muhe cu ta forma 80% di e totalidad. E meta ta pa caba cu violencia relacional, esaki ta encera yuda e abusador cu ta ocasiona e violencia relacional, cual tambe ta inclui, por ehempel, ora un yiu adulto ta abusa financieramente di su mayornan.
Ta prueba cu den pandemia e violencia relacional familiar a aumenta drasticamente. Banco di Caribe ta masha contento di por duna un contribucion na un fundacion asina importante den comunidad. NOTA: Si bo ta experienciando violencia relacional den famia por tuma contacto cu FCVR na number 583.5400 of por Whatsapp/ yama 567.1670. Bishita nan pagina di Facebook https://www.facebook.com/FCVRaruba pa mas informacion.
Riba e foto por mira Sr. Giovanni Croes, Managing Director Commercial, Sr. Elvin Maduro, Managing Director Operations di Banco di Caribe y Sra. Maria Carrasquilla trahado social di FCVR.
