Prijs di transportacion di productonan ta sigui aumenta --- *Situacion mundial ta afecta e resultado economico mundial --- *Temporada di maximo circulacion di placa na Aruba afecta
ORANJESTAD (AAN) — Falta algun dia pa Aruba drenta Semana Santa.
Durante dos aña, Aruba no a conoce e ambiente di Semana Santa manera e pais a costumbra y e speransa tabata cu na 2022, e situacion lo a normalisa.
Informacionnan cu DIARIO a logra compila durante ultimo dianan ta mustra cu e situacion na Aruba ta sigui sumamente dificil y cu e inflacion cu mundialmente a wordo registra, a baha e poder di compra local.
“E lunanan Maart, April y Mei generalmente tabata lunanan di bon entrada na Aruba tanto pa loke ta trata resultado di e circulacion di placa local como e entrada na turismo,” un informante a mustra DIARIO.
Durante e tres lunanan aki, Aruba tabata celebra Pasco Grandi, cumpleaños di Rey y Dia di Labor.
Tabata un temporada di hopi actividad local cu tabata causa mas circulacion di placa na tur nivel di economia.
E medidanan cu mester a tuma mundialmente contra Covid-19 a afecta e resultadonan di turismo directamente.
Mientras turismo ta restablece su mes di e crisis, otro factor importante ta presenta su mes cu ta e inflacion enorme pa motibo di e guera na Ukraine, cu a afecta e prijs di petroleo cu ainda ta fluctua.
Paisnan grandi a haci uzo di nan reservanan di petroleo. E prijs di petroleo a cuminsa baha pero tin otro factornan cu ainda ta influencia prijs rond mundo, cu ademas ta biba den e suspenso di guera mundial.
Informacionnan ta indica cu e placa cu e Arubiano tin pa gasta durante Semana Santa, a wordo afecta dor di circumstancianan.
Si originalmente negoshinan a pensa cu nan lo a cuminsa mira cierto ganashi of aumento di ganashi, esaki no ta e hecho pa motibo di inflacion, costo basico di bida.
Ciudadanonan cu den e temporada aki tambe tabata haya un entrada extra dor di actividadnan special, tambe ta di opinion cu e situacion na 2022 lo ta diferente.
Cu e problema no ta limita su mes na Aruba, ta algo cu a bini dilanti y ta bolbe mustra cu e turista tambe tin menos placa pa gasta na Aruba pasobra su gastonan na cas y pa biaha a sigui aumenta.
Un gasto cu actualmente tin atencion serio ta e transportacion cu a bira sumamente caro debi na e problemanan cu companianan di barco ta enfrenta cu sancionnan cu a wordo tuma contra Rusia.
E demanda pa transporte di producto no ta haya cumplimento, loke tambe ta manda prijsnan halto.
Na vispera di e prome Semana Santa cu despues di dos aña ta conoce posibilidadnan cu no tabata posible pa motibo di e pandemia, awor otro problemanan ta stroba e produccion comercial di actividadnan cu tabata parti di costumber den e lunanan menciona.
Esaki lo nifica pues menos placa den circulacion, loke lo bay afecta mercado comercial local mientras mundialmente tin temor pa e posibilidad di un recesion cu lo causa mas problema.
