Crisis Team y SMAC ta preparando pa Aruba su prome “Test Event” pa bay bek na normalidad

ORANJESTAD (AAN) – Minister di Salud Publico, Dangui Oduber, a menciona den conferencia di prensa, tocante actualizacion di e situacion di Covid-19,

cu for di hopi tempo caba Crisis Team ta pensando riba diferente opcion y manera, di con por flexibiliza y bisando cautelosamente, con pa bolbe bek na “normalidad”, teniendo cuenta cu Covid-19 tey presente ainda, y sigur e siguiente lunanan e no ta bay disparce tampoco.

            “Ta cuestion di nos mes como pais con nos ta prepara pa flexibiliza e medidanan, cu e protocolnan ‘in place’ pa asina, na un manera safe y sigur, nos por bolbe bek na e normalidad cu nos a custumbra. Tin varios pais caba, rond mundo, cu por mira cu a bolbe bek na normalidad y poco, poco, Aruba tambe ta bayendo den e direccion aki. Nos a flexibiliza caba varios di e medidanan; horario di ciere a wordo adapta, y manera ta conoci nos tabata preparando pa organiza e prome ‘test event’ hunto cu SMAC y Crisis Team. E ultimo siman tin varios reunion andando caba pa e prome evento aki por tuma lugar”, e mandatario a indica.

            Esaki ta un actividad unda cu 250 pareha por acudi. Pa e parehanan por haya entrada, nan mester ta vacuna of presenta un test di covid-19 negativo; e evento aki lo wordo organiza den un ballroom, y manera tabata custumber den eventonan den pasado, por balia. Lo tin musica di banda en bibo, y door cu ta e prome ‘test event’ DVG su task force tambe lo ta presente, pa haci e controlnan necesario conforme e protocol y e palabracionnan cu a wordo haci entre Crisis Team y SMAC pa e evento aki cana segun e palabracionnan. Y despues di e evento aki lo bay haci un evaluacion, con el a bay, anto e intencion di e ‘test event’ aki ta pa, obviamente, brinda na un manera safe y sigur e oportunidad pa tur esnan cu ta organiza eventonan, y tur esnan cu tabata tin deseo pa organiza esakinan y a wordo perhudica pa motivo di Covid, durante e ultimo aña y mey, haya tambe e oportunidad di por cuminza organiza e tipo di eventonan aki; naturalmente, teniendo cuenta cu e protocolnan vigente, y sigur cu na comienzo task force lo tey presente, pa haci e controlnan necesario.

            “ Esaki ta e prome stap cu nos ta tuma pro-activamente, pa hunto como pais, cuminza bolbe bek na normalidad; ta fiestanan cu ya caba pa un aña y seis luna no a wordo organiza” minister Oduber a reitera.

            E dignatario a indica cu na Hulanda nan a organiza varios ‘test event’ prome cu nan a bolbe na normalidad, y esun cu e ta anunciando ta bira e prome na Aruba.

            El a subraya cu e diferencia entre Aruba y otro paisnan grandi cu a bolbe na normalidad ta e hecho cu Aruba ta keda cu limitacion di su capacidad na ICU. “Nos no tin hopi capacidad manera nos lo a desea; nos ta trahando si conhuntamente cu Hospital y AZV riba un plan, pa na un forma structural amplia nos capacidad, pasobra ora nos habri bek na normalidad mester percura pa bo tin suficiente capacidad y personal, y e ultimo añanan aki Hulanda a yuda nos cu personal di AMI, pero nos no ta bay dispone di nan mas. Kiermen, nos riba propio forza, mester bay percura pa nos busca e personal necesario pa nos por garantiza un cierto capacidad di ICU cu pa nos por ta aceptable, pa nos por bay bek poco, poco, na normalidad”, e mandatario a remarca.