Camponan di gas na Israel y un momento crucial pa energia
- Inflacion lo bira realidad na salida di mundo di Era di Petroleo
- Conflicto mundial na caminda di aña di eleccionnan importante
ORANJESTAD (AAN)- Na varios ocasion DIARIO a presenta e realidad di 2024 como un aña di gran importancia pa motibo di cantidad di eleccion cu lo tuma lugar durante 2024 y na 2025.
Eleccionnan cu por trece cambio importante den e politica mundial general na paisnan grandi manera Merca, Union Europeo y hasta Rusia na su forma.
Salida di azeta den cuadro di cambio di clima a nifica cambio grandi den e mundo di energia cu na e momentonan ta deshaci di resultadonan di esfuersonan pa a evita un recesion na 2023.
Si na 2023, e shock economico grandi cu a wordo spera no a bira realidad, ta pa motibo cu a baha e prijs di petroleo y a evita asina recesion.
Mientras na e momentonan aki, cada minuut ta produci mas horor humano den e conflicto na Medio Oriente, a base di e atake di e grupo Hamas ariba Israel, economia mundial ta confronta problemanan serio cu lo afecta bida na tur parti di planeta Tera.
Manera por a spera ayera e prijs di petroleo a bay halto mundialmente, mientras na nivel di liderazgo mundial por a nota formacion di camponan di lineanan ideologico riba tereno politico.
Na momento cu Israel ta den estado di guera, mercadonan pa cual mester a exporta gas di Israel dentro di un par di aña, ta na suspenso.
2023 lo cera cu un mundo, cu a pensa cu el a domina e peliger di prijs di gas y azerta, pero a wordo confronta ayera cu un aumento drastico di prijs di tur producto petrolero.
Un mercado di azeta sumamente instabil a presenta su mes ayera, mientras e prijs di petroleo a subi, baha, bolbe subi na e diferente fuentenan mundial di combustibel.
Informantenan a mustra DIARIO cu inflacion mundial na e momentonan aki lo tin impacto sumamente grandi na un mundo, caminda un cantidad di eleccion mester tuma lugar.
Eleccion semper ta trece un cierto grado di instabilidad. DIARIO prome cu por a papia of hasta pensa di e crisis na Medio Oriente, a mustra con importante e situacion politico na 2024 y 2025 lo ta debi na e cantidad di paisnan cu ta bay urna electoral.
E suceso na Medio Oriente y aumento di prijs di petroleo, por tin resultadonan enorme na mundo y liderazgo na diferente pais, caminda por nota entrada continuo di politiconan nobo.
Informantenan di DIARIO ta mustra cu e situacion economico mundial nobo lo tin un impacto sumamente serio na un mundo cu a bandona un pandemia y na 2023 mester a evita e recesion grandi cu a wordo spera pero cu a presenta su mes na forma mas modera na paisnan sumamente importante pa economia mundial, cu actualmente ta den un ambiente di confusion enorme, manera a wordo trece dilanti.
DIARIO ta sigui indaga riba tur tereno pa asina por presenta informacionnan na su lectornan den un situacion mundial sumamente dificil sigur pa e forma cu e ta aende directamente pa e bienestar social di tur hende na mundo.
