Creactivo Conference 2024 ta delinea un futuro briyante pa e Industria Cultural y Creativo

ORANJESTAD (AAN): E industria cultural y creativo ta un sector den pleno desaroyo na Aruba.

E termino "Economia Oranje" ta inclui e industria relaciona cu creatividad, cultura, arte, entretenimento y innovacion.

            Pa Aruba, un isla chikito cu un herencia cultural rico, e industria aki por bira un pilar importante pa e economia y pa por difundi e diversidad cultural di Aruba riba un plataforma global.

            Den e añanan recien, Aruba a cuminsa mira mas e importancia riba e sector di arte, musica, cinematografia, moda, diseño, literatura, y turismo cultural. Esaki ta un refleho di un movecion mundial pa balora mas e talento creativo y e potencial economico di e culturanan local.

            Mientras e sectornan industrial mas tradicional ta enfrenta reto, e 'economia oranje' por duna un alternativa innovativo y sustentabel pa diversifica e economia.

            Un evento cu ta duna un empuhe importante na e desaroyo di e 'economia oranje' na Aruba, ta e Creactivo Conference 2024 organisa pa Go Cultura Foundation cu a inicia riba diamars na Renaissance Convention Center.

            E conferencia aki a reuni profesionalnan creativo, emprendedonan y amantenan di arte pa discuti e futuro di e industria creativo riba e isla. Den su prome edicion, Creactivo Conference 2024 a trece speransa y inspiracion pa e comunidad creativo di Aruba.

            E conferencia a duna un plataforma pa explora riba e diferente manera cu arte y innovacion por impacta positivamente e comunidad local y promove Aruba como un destinacion di excelencia creativo den e region.

             Discusionnan riba tema di financiamento creativo, e poder di arte y creatividad den educacion y e poder di colaboracion den e industria creativo tabata parti esencial di e evento, stimulando e interes pa mas participacion y desaroyo den e sector.

            Durante e conferencia a conta cu participacion di oradonan local, entre nan Ronella Croes di Oficina di Turismo, Tisa Lasorte di AHATA, e diseñado Ronchi de Cuba.  Tambe tabatin invitadonan internacional cu a duna nan aporte na e tema importante aki manera John Howkins, un strategista global y consehero pa loke ta e tema di economianan creativo; Felipe Buitrago Restrepo, kende ta autor, economista, strategista y ex minister di Cultura di Colombia; John King, ex minister di Economia Creativo, Cultura y Deporte di Barbados y Clara Reyes, hefe di e departamento di Cultura di e Ministerio di Educacion, Cultura, Hubentud y Deporte di Sint Maarten.           

TURISMO CULTURAL

            Un di e desaroyonan clave na Aruba ta e promocion di turismo cultural. Turista no ta bin solamente pa solo y beach, sino pa conoce e rikesa cultural, historia y arte local. Pa esaki, ta importante tin mas festival di arte, exposicion, y evento cultural, locual ta duna trabou na e artista y creativonan den diferente area, y ademas di tin un impacto positivo riba e imagen internacional di Aruba.

            Mas leu, e 'economia oranje' ta un espacio importante pa e comunidad hoben cu mester di expresa nan mes a traves di arte y cultura. E industria ta ofrece e oportunidadnan pa emprendimento y creacion di trabou cu no ta dependiente di e sector turistico tradicional, pero ta hopi bon relaciona cu esaki.

            Na un isla chikito ta esencial pa yega na mas manera pa diversifica e fuentenan di ingreso, y e industria creativo por bira un elemento vital den e desaroyo aki.

            Pa sigura e futuro di e 'economia oranje', mester sigui inverti den infrastructura y formacion di talento.

            Den resumen, e industria cultural y creativo ta un motor potencial pa e futuro economico y social di Aruba. Ta un industria cu por no solamente preserva cultura, pero tambe promove innovacion, inspira emprendimento y sigura un futuro prospero pa e generacionnan venidero.