Un asunto cu DIARIO a atende for di inicio pandemia awe ta bira central - Un pais tin deber di tuma medidanan cu ta proteha salud y bida di hende - Limitacion pa persona cu no kier vacuna tin tur derecho di existencia
ORANJESTAD(AAN)- For di e prome momento cu Covid-19 a haci su entrada na mundo, DIARIO a presenta e punto cu mester tuma medida contra personanan cu ta nenga di tene nan mes na regla y asina ta crea un peliger di salud pa personanan cu si ta tuma medidanan pa evita cu nan ta wordo infecta.
Derechonan Humano a bira factor na cual cantidad di hende a tene ora autoridad a introduci medidanan manera bisti tapaboca y tene distancia social.
Na Aruba tambe a lanta gruponan cu a opone e Toque de Queda, a opone e lock down cu cual Gobierno kier a cera porta pa Covid-19 y asina evita cu mas hende lo a bira victima di e malesa sea na forma pasahero of fatal.
Na momento cu un vacuna a wordo descubri, e confrontacion entre diferente grupo a bira mas grandi y awe por registra un culminacion na momento cu cantidad di pais ta introduci regla no solamente pa hende cu kier drenta e pais, pero tambe hende cu kier participa activamente na bida diario.
Bisti mask a bira obligatorio na hopi pais, sigur ora ta frecuenta luganan cera. Pero e problema mas grandi ta keda, si mester nenga un persona cu no ta vacuna entrada na un luga of hasta un trabou.
Un confrontacion pisa den derecho humano di e persona cu ta proteha su bida y e persona cu kier su libertad pa busca morto mes, ta presenta su mes mundialmente.
Esaki ta hiba mundo atrobe na e lucha cu a wordo encadena dor di e palabranan “derecho humano” cu a bira un instituto verbal di Nacionnan Uni.
Kico ta un derecho humano? Con leo por yega cu derecho humano?
Preguntanan cu hende ta haci su mes.
Kico ta un derecho humano y con por regla cu derecho di un hende, no ta mishi cu derecho di e otro?
Ora analisa diferente factor, ta yega na e conclusion cu e unico forma pa tur hende mantene derecho humano na forma optimal, ta cu si tur hende bay biba riba un isla y no den un comunidad, aunke e momento ta presenta otro problema pasobra mester bay determina kico ta pasa cu poblacion mundial.
Un mama tin derecho pa aborta un yiu of mester proteha e derecho di e yiu tambe? Un anciano tin derecho di pone fin na su bida, aunke su mente ya no ta permiti pa e tuma e decision aki?
A base di kico un persona ta nenga un vacuna? Tin religion cu ta prohibi vacuna. Pero tambe tin teoria cu hasta por considera conspiracion contra e vacuna pasobra nan ta crea panico cu e vacuna hasta por cambia un hende den un animal.
Pa atende e asunto aki completamente den cuadro di Ley, mester bolbe na e Ley mas importante. Un Gobierno na un pais democratico mester sirbi bienestar di e poblacion.
Na momento cu ciencia entrega prueba cu bida ta wordo salba dor di vacuna, cu no tin resultado pa e hende por lo general, mester exigi pa hende cu no kier vacuna, no crea peliger pa e persona cu ta vacuna.
Mescos cu ora luz di trafico ta berde, un vehiculo por sigui core y ora luz ta cora e mester para, mester tene na regla cu ta evita cu hende ta sigui duna asistencia na un virus mortal y mester separa e persona vacuna contra e persona cu ta nenga vacuna mescos cu ta separa un persona cu ta cana cu un arma y por herida otro, for di otro ciudadanonan.
