Presidente di SADA Edward Maduro:
ORANJESTAD (AAN) -- E sindicalista Edward Maduro, presidente di SADA (Sindicato di Aduana), den entrevista cu DIARIO a comenta cu despues cu COVID-19 a pasa, tur cos a bolbe na normalidad, y entradanan na caha di gobierno door di Aduana, a bira mescos y hasta a aumenta te cu e ta bayendo den un bon direccion. “Pero, lamentablemente, e trahado no ta wak esaki como un progreso p’e”, Maduro a expresa.
Maduro a señala cu e aña aki Aduana a keda cla, parcialmente, cu un salario ilegal cu gobierno a introduci. “Nos ta bisa ilegal, pasobra esey no ta locual nos a firma cu gobierno na 2017. “Mester bisa cu ainda nos ta den Corte cu esaki, y nos ta spera un decision den Corte de Apelacion”, Edward Maduro a indica.
El a agrega cu, individualmente, nan a cuminza e proceso pa bay den bezwaar contra tur e landsbesluitnan cu nan a bin ta bisa tur e añanan aki desde cu e Gobierno na mando a sinta. “No a importa gobierno cu e decision cu a wordo tuma y a ser firma na 2017, y tambe danki na DRH cu no tabata mucho sincero pa loke ta esaki, nos ta den Corte y e lo bay tarda pasobra nos tin alrededor di 160 bezwaar den esaki, y te otro aña Corte lo por cuminza trata esaki” Edward Maduro, lider di SADA a señala.
E sindicalista a agrega cu nan tabata tin un registro, algun luna atras, unda cu Corte a bisa nan cu normalmente, nan ta trata 150 caso pa aña di ambtenaar, pues di Duana so nan tin mas di 150 caso di un shot, sin conta tur e otro casonan di promocion cu ta tranca inhustamente. “ Sin conta e otro sindicatonan y ambtenaarnan cu tin caso den Corte. Pues, ta un situacion hopi fastioso pa nos, pa nos trahadornan cu ta demotiva pa esaki tambe”, el a señala y a reitera cu, lamentablemente, e trahador mes no ta wak ningun tipo di progreso si cu locual ta drenta den caha di gobierno”, Maduro a remarca.
E lider sindical a añadi cu Cuerpo di Aduana a wordo priminti un edificio nobo, y hasta e parlamentarionan a felicita Aduana cu su edificio nobo. Esaki na 2021 y mas di dos aña a pasa caba y ni e prome piedra gobierno a pone.
“Mi ta kere cu tin mas yiwana cu shoco ta biba den e edificio, y ta hopi tristo di wak con Cuerpo di Aduana ta wordo trata, y nos tin cu bisa cu speranza no ta perde, bo ta keda cu FE cu algo ta cambia, pero nos ta sigui lucha y pesey sindicato SADA ta carga e confianza di su miembronan pa e sigui bringa pa nan bay dilanti”, Edward Maduro a subraya, finalmente.
