ORANJESTAD (AAN): Den e tienda di Cosecha situa den e edificio historico y monumental na Playa, tin un surtido varia di arte y artesania cu tin e seyo nacional di artesania di Aruba.
Cosecha tambe tin un centro den e edificio di Oranjestad cu ta brinda un espacio creativo unda hende por bin haci arte.
Special pa dia 19 y 26 di augustus, Cosecha ta organiza dos workshops di painting cu e artista local Erika Moran.
E prome diahuebs 19 di augustus tin un workshop unda lo combina flora y fauna. Participantenan ta bay pinta un vlinder riba un flor. Material cu lo usa pa e workshop aki ta crayon, un material cu ta consisti di wax y color. Pa e workshop aki nos lo pinta riba papel special pa por siña con pa domina e uso di crayon.
Diahuebs 26 di augustus, participantenan ta bay pinta cu verf di aceta y charcoal un paisahe di Aruba. Atrobe e materialnan cu ta bay usa ta special. Y e biaha aki lo combina dos tipo y lo pinta riba canvas. E workshopnan ta pa hende riba 18 aña di edad, y ta for di 6:00 pm te cu 8:00 pm, y nan lo cobra pa bo participa.
