Den Parlamento a trata leynan contra e causa mas grandi di crimen mortal - E placa sushi di corupcion mester wordo laba pa destinacion y origen keda secreto - Tecnologia moderno a facilita criminalidad cu ta conduci hasta na morto
ORANJESTAD(AAN)- Ora papia di corupcion den Gobierno of den empresa priva, e realidad mas serio ta keda scondi pa ciudadanonan. E realidad di corupcion a bini dilanti ayera, ora Parlamento di Aruba a trata e Ley pa combati labamento di placa y financiamento di terorismo.
Hunto cu e ley aki, a wordo trata e control cu mester tin riba placa efectivo cu ta drenta y bandona e pais mescos cu e areglo pa zonanan liber, caminda no ta paga belasting na forma legal.
Mester papia di un pakete total cu ta inclui supervision di credito, trafico di placa efectivo, e ley cu ta exigi Gobierno tene destaho publico.
Tur e leynan aki ta cay bou e pakete di AML, Anti Money Laundering (labamento di placa), y CFT, cu ta ley pa combati financiamento terorista.
E loke Parlamento a trata ayera tabata hustamente leynan cu mester combati e crimennan mas grandi cu ta menasa bida y bienestar di hende y comunidad y cu ta nace directamente den corupcion den Gobierno y na empresanan priva.
Leynan ta haci cu banconan y tur luga cu ta atende cu placa, mester notifica autoridad competente ora tin transaccionnan contra e leynan cu mester combati labamento di placa y financiamento di terorismo y crimen.
Pa Aruba corupcion a haya un cara cu ta haci cu porfin comunidad ta comprende kico ta pasa ora un gobernante haci su mes castigabel di corupcion cu mester bira comprendibel den e realidad di bida na Aruba, cu ta sclama pa solucion di criminalidad.
Corupcion ta nifica cu un funcionario, ta kibra regla y ley pa beneficia un persona of compania y asina finalmente beneficia su mes pasobra e ta wordo paga pa kibra ley.
Pues aki por mira e circulacion di placa cu tecnologia a haci completamente invisibel.
Un Gobernante por ehempel ta haya placa bou mesa pa e regla algo pa un persona. E loke e ta regla ta kibra leynan cu ta proteha comunidad of ta hasta parti di propiedad di un pais.
Corupcion ta directamente mara na kibra democracia na un pais, caminda tur hende tin mes derecho riba tur loke e mester pa su bienestar y e pais mester produci of percura pa ta existi.
Na momento cu un politico haci su mes culpabel di esaki, e ta bende su mes, ta kibra su huramentacion y ta habri porta pa crimen organisa cu ta origen di morto di personanan cu mester wordo kita for di caminda pa nan no divulga loke ta pasa.
E formanan mas cruel ta wordo utilisa pa pone fin na bida di hende cu tin prueba contra crimen scondi, cu ta cuminsa na momento cu un gobernante of funcionario den un empresa priva, bende su mes.
A base di pago, ley ta wordo kibra. E pago mester wordo haci na un forma cu ta keda desconoci pa bista di publico. E placa mester bandona e cuenta bancario di e persona cu a ricibi e fabor y bay resulta den man of cuenta bancario di un gobernante.
Pa esaki ta posibel por abusa di e placa cu politiconan ta ricibi pa tene nan campaña. E 100 Mil Florin na bandera, por ta diferente y e placa ta wordo reparti na un forma secreto cu un grupo sumamente limita conoce.
Aki ta papia pues di un crimen organisa. Di loke ta bira un banda criminal di mes naturalesa cu terorismo y Maffia.
Den Parlamento pues ayera a trata con circulacion di placa mester keda limpi pa evita cu hende inocente, cu ta cay den trampa ta muri y hasta un persona cu a mira loke e no mester a mira, ta bira victima di Maffia cu ta sconde tras di mascara y sistemanan cu tecnologia moderno ta haci posibel.
No ta necesario mas pa cana cu hemchi di placa.
Den e leynan cu a pasa, man di banconan y instancianan cu ta atende cu placa, ta wordo mara.Ley ta proteha e persona cu ta haci bon y ta castiga e persona cu ta kibra ley y asina no solamente ta perhudica un pais pero ta haci su mes culpabel di crimen organisa dor di criminalnan desconoci y den funcionnan importante of cu por paga pa e fabor cu nan ta ricibi.
Corupcion ayera a haya su cara real y a keda demostra na Pueblo kico ta sconde den e mundo di corupcion politico cu por ora e conecta cu criminalidad, por causa hasta morto di ciudadanonan pa medio di crimen organisa dor di bandanan cu ta sconde terorismo practico pa bista di pueblo pa asina placa sushi bandona su origen y alcansa su destino!
