Corte Comun di Husticia ta celebra 'dies natalis' cu Almuerzo di Libertad

ORANJESTAD (AAN): Dialuna 5 di mei 2025, Corte Comun di Husticia a dedica atencion na e importancia di libertad y democracia den parti caribense di Reino hulandes.

E dia aki a cay poco despues di e celebracion di e dies natalis di Corte, riba prome di mei. Tanto e di 156 aniversario di Corte como Dia di Liberacion a keda conmemora cu un serie di actividad significativo riba cuater isla. 

Como parti di e Cuminda di Libertad anual, a haci entrega di e Sopi di Libertad special, un

cuminda simbolico cu ta distribui den tur pais. 

Na Aruba, coleganan a congrega pa come e sopi hunto, mientras a mustra documentalnan

tocante di libertad y derechonan humano. 

Na Boneiro a tuma luga un almuerzo conhunto, sigui pa un lectura impresionante di Arthur

Sealy tocante di e impacto di Segundo Guera Mundial na Boneiro, incluyendo e historia di e

campo di concentracion cu tabata situa riba e isla. Pa e almuerzo y presentacion aki tambe a invita hobennan di Fundacion Rosa di Sharon pa comparti e experiencia aki. 

Na Corsou, coleganan a congrega pa un almuerzo comparti, precedi pa un lectura di Esmeralda Wijngaarde, yiu muhe di defunto Frank Wijngaarde, kende a fayece na 1982 den e Asesinatonan di December na Surinam. Durante e reunion, Esmeralda a comparti algun fragmento di su memorianan cu lo publica pronto, den cual e ta entrelasa su historia personal cu topiconan mas amplio, manera e vulnerabilidad di libertad, democracia, e estado di derecho y inhusticia. 

Na Sint Maarten, participantenan a disfruta un almuerzo, mientras a mustra fragmentonan di video tocante di e topico di libertad, sigui pa un quiz interactivo basa riba e videonan mustra. 

E Cuminda di Libertad ta un momento anual pa hende den henter Reino – di Hulanda te e islanan caribense – congrega pa comparti historianan y conmemora e balor di libertad. Den e marco aki, e Sopi di Libertad, componi tur aña pa otro chef hulandes cu un historia personal, ta simbolisa conexion; simpel, accesibel y universal.