ORANJESTAD (AAN): Luna pasa, 24 April 2023, ex-Ministro Otmar Oduber, asisti pa abogado mr. Carlo, a cuminsa un caso contra Fiscal di Ministerio Publico relaciona cu e caso penal Flamingo.
Abogado mr. Carlo, representando Otmar Oduber, a pidi Hues pa ordena Fiscal pa bisa si ta persigui Otmar Oduber den caso Flamingo of no.
Ta asina cu Hues di “Raad Kamer” a rechaza e peticion aki.
Rechaza peticion aña pasa: Aña pasa na October 2022, mr. Carlo a cuminsa un caso y a pidi Hues pa ordena Fiscal pa cera e investigacion den caso Flamingo. E tempo ey Fiscal a bisa Hues cu ta casi cla cu e investigacion y cu ta calcula cu na Januari 2023 lo ta cla.
Esey tabata motibo cu Hues a rechaza e peticion di mr. Carlo.
E aña aki for di Januari 2023, mr. Carlo tabata puntra Fiscal con a para cu e investigacion caso Flamingo. Mr. Carlo no a keda satisfecho cu e reaccion di Fiscal y na Maart 2023 el a manda peticion na Hues pa instrui Fiscal pa stipula un fecha cu e investigacion ta cla.
Fiscal a laga sa cu a keda cla na medio Maart 2023 y cu e pakete di documentonan ta hopi grandi.
- Carlo den e caso di 24 April 2023, a cuestiona e tardanza den e investigacion y cu for di 2020 no tin ningun sospecho nobo. Na opinion di e abogado, tur cos ta basa riba declaracion di Parlamentario Marisol Lopez Tromp.
Hues a rechaza peticion: Por a compronde cu Hues di “Raad Kamer” a rechaza e peticion di mr. Carlo pa ordena Fiscal pa bisa si tin caso penal contra Otmar Oduber of no den caso Flamingo.
Den combersacion cu abogado mr. Carlo, el a duna di conoce cu Hues a rechaza e peticion pasobra Hues ta haya cu mester duna Ministerio Publico espacio pa por delibera si ta persigui Otmar Oduber of no.
