Asociacion di Comerciantenan di San Nicolas (SNBA)
ORANJESTAD (AAN): De e conferencia di prensa convoca pa Asociacion di Comerciantenan di San Nicolas (SNBA), señor Errol de Freitas, Secretario di SNBA a elabora riba nan posicion relaciona cu construccion di hotel cu mester habri na November di 2024.
Segun de Freitas, loke mester a bira un celebracion, awo e hotel ta encontrando un situacion atrobe, cu den su opinion, ta totalmente inhusto. El a splica cu no pa compara nan mes, pero tin hotelnan y otro construccionnan cu no ta haya ni un 10% di e contratempo cu nan a haya. Hopi na San Nicolas ta puntra "Why San Nicolas? Why we again?" Si no ta un ta e otro y tur ta bringando, pero no ta tene na cuenta cu e distrito, e comunidad di San Nicolas y e area. Un area cu nan ta celebrando un tereno di refineria cu otro aña ta celebrando 100 aña y nan ta bezig ta purbando di desaroya pa logra mas sostenibel.
De Freitas a bisa cu aki ta papia di un hotel y si por weita e ROPV ta specialmente pa duna San Nicolas un hotel all inclusive, pa asina trece y stimula un economia na San Nicolas. Esaki lo nifica mas trabao y mas oportunidad pa San Nicolas.
El a indica cu e no kier causa un conflicto, pasobra esaki lo ta habri caminda pa un dialogo, no tin caminda pa yega na un entendimento, y tampoco pa surpasa e diferencianan di opinion. Pa e motibo aki nan kier mustra nan apoyo na e catalizador cu lo engrandece nan economia. Nan lo sigui defende e proyecto, specialmente contra algun ciudadano den e area cu ta sinti cu nan derechonan no a wordo tuma den consideracion, pasobra nan no lo tin e mesun bista di semper. de Freitas a puntra, nan mester para un proyecto completo, cu ta un beneficio nacional djis pa un 'bista'.
De Freitas a enfatiza cu e Landspakket ta hopi duidelijk, mester percura pa proyectonan pa trece balance economico pa San Nicolas y pariba. Pabao di brug no tin e problemanan aki den sector hotelero, ningun hende ta protesta y hotel ta sigui bin. El a expresa cu SNBA no tin problema cu esaki. Pero tur cos ta mustra cu ROPV a cay, pasobra pa pabao parce cu no tin ROPV.
E tambe a bisa cu mayoria di hendenan di San Nicolas ta traha pabao, y ta con economia di San Nicolas por florece, si nan ta gasta nan placa pabao tambe.
De Freitas a papia riba veredicto di e hues cu a habri e 'Pandora's Box' cu a habri caminda pa un aspecto negativo, so solamente pa San Nicolas sino pa e resto di e isla. Pa via e 'tussenvonnis' a shutdown un proyecto cu ta den pleno proceso. Segun e ley ROPV, e unico 'all inclusive' cu lo bin Aruba ta esun di Secrets pa asina habri e posibilidad economico pa San Nicolas. Hopi biaha ta wordo bisa cu San Nicolas ta un 'ghost town' y segun de Freitas esey ta pa motibo cu nan no ta haya e estimulo necesario pa crece.
SNBA ta wak cu tur obstaculo contra construccion di e hotel ta simplemente inaceptabel y cuidao nan dicidi di bandona e proyecto pasobra nan a cansa di contratiempo, e pregunta lo ta, ken ta bay para responsabel pa e daño aki? Acaso e grupo cu ta preocupa pa nan 'bista' bunita? Ora un hende ta cumpra un cas, e bista no ta garantiza.
De Freitas a enfatiza cu e no tin nada contra di e grupo aki, pero e bienestar di e comunidad y di e isla mester ta na prome lugar.
