Corsou a aplaudi pelicula “E Bruha, Bruhà”

ORANJESTAD (AAN): E pelicula local di Desiree Croes, E Bruha, Bruhà, a causa  alegria y admiracion den Krioyo Film Festival 2025 na Corsou.

Un sala yen di fanatico di pelicula na Papiamento a disfruta di e drama comedia di Aruba aki. Na final, e comentario y alegria pa cu e actornan tabata grandi. Tabata e di dos edicion di Krioyo Film Festival y a tuma lugar den Caribbean Cinemas na Sambil. Bunita tabata pa mira amigonan Arubiano biba na Corsou den e sala manera Roxanne Pieters, Emma Croes, personahenan conoci manera e.o. productor Orlando Martina, Maria-Liberia Peters ex-Prome Minister di Antias Hulandes, amigonan Diony Eduarda, Harry Allard, Stephanie van Heiningen y mas.

Tanto productor y actris Desiree Croes como actor Addonsito Croes tabata presente y a disfruta y comproba tur reaccion di esnan presente.

Na final e comentarionan tabata mas cu positivo y e team di actor y productor por ta sigur y orguyoso di e impacto cu e pelicula a causa den e festival. Di e organisador Giovanni Atalita a compronde cu E Bruha, Bruhà ta nomina pa pelicula di aña pa e Kadushi di Oro 2025.  Mas informacion por bishita e Facebook page di Krioyo Film Festival.