Cordando 60 aña pasa e logro historico di seleccion di futbol Antiyano na nivel internacional

Historia den Deporte

• Logronan den weganan na Guatemala 

ORANJESTAD (AAN): Den e fechanan aki 60 aña pasa, esta na 1964 y luna di April a sali un delegacion Antiyano di futbol hubenil. Cu puro futbolistanan criollo hungadornan cu ta hunga futbol den campeonatonan local. E seleccion Antiyano di futbol a subi avion pa participa den e campeonato di CONCACAF cu ta cubri Centro America y Caribe, na ciudad di Guatemala.  Pa cortesia di e experto local di futbol, esta Ronny Elizabeth, a ricibi e relato aki y tambe tres potret di e epoca aya.

   For di Aruba tambe tin hende cu a forma parti di e delegacion como futbolista- y dirigentenan deportivo. Como hungadornan Arubano tin e.o. Osling Toppenberg, prome portero, y di Aruba Juniors, tambe tin Urbano Kock, links back, di Dakota F.C.  Otro ta Roy Simon volante R.C.A., Remigio Jacobs, volante Bubali F.C., Betico Dubero (qepd) volante Estrella F.C.  Tambe tabatin Richard Jacobs (qepd) volante delantero, di Dakota F.C.   Como capitan di team tabatin Frank Richardson, kende ta volante Dakota F.C.

   Manuel Oduber (qepd) tabata masahista, y Edmundo Kemp tabata Assistant Trainer.  A viaha tambe Fichi Croes, kende tabata President y A.V.B. vice presidente N.A.V.O. y a fungi como lider di delegacion.

   Tabatin un compeñarismo den un grupo masha uni di futbolistanan y hasta e dirigentenan. E team di Antiyas a bay hunga na e supersede na Mazatenango, cu ta un ciudad cu ta keda 4 ora for di e ciudad di Guatemala. Antiyas a debuta contra di e fuerte equipo di Mexico, e favoritonan pa bira campeon. Pero cu un goal historico di e Arubiano, Richard Jacobs, e seleccion di Antiyas a derota Mexico cu score di 1-0.

   E historia a sigi, cu wega despues di Antiyas vs. Honduras.  E seleccion di Antiyas a derota Honduras cu score di 1-0, danki na goal di Ronny Elizabeth. Despues a sigui un wega contra Panama, y aki e partido a keda empata na 2-2 cu goalnan di Remigio Jacobs y Flavio Maduro. Antiyas na final a keda campeon den e grupo y Honduras como sub-campeon.

   E finalnan a yega: E di dos parti di e historia a continua na ciudad di Guatemala den e finalnan. Cu a resulta di ta wega di El Salvador vs. Guatemala, y Antiyas vs. Honduras. E partidonan di Antiyas Hulandes a desarolla di siguiente forma:

   Antillas a perde e prome wega contra El Salvador cu 0-2 y a perde di dos wega contra Honduras 2-4, cu dos goalnan di Ronny Elizabeth. Antiyas a gana e ultimo partido contra di Guatemala cu score di 1-0 cu goal di Ronny Elizabeth. Asina pues El Salvador a keda campeon cu 6 punto, y invicto.  Antiyas, Honduras y Guatemala a keda empata cu dos punto cada uno.

   Cu promedio di goal, Honduras, Antiyas y Guatemala a keda tras di otro, y e futbolista campeon goleador di e campeonato, a keda Mario Caballero di Honduras cu 5 goal. Sub-Campeon goleador a bira Ronny Elizabeth di Antiyas Hulandes cu 4 goal, empata cu 3 centro americano mas cu tabata Carlos Ruano (di Guatemala cu 4 goal), Daniel Corneyo (El Salvador cu 4 goal), y Guillermo Ruiz (El Salvador cu 4 goal).

   Hungadornan: Hecho ta cu tur e hungadornan di Aruba a destaca riba tereno.  Por menciona cu Frank Richardson a fungi como gran capitan hungando den tur e weganan. Betico Dubero tabata un gran medio-campista den tur e weganan. Osling Toppenberg como e promer keeper di e seleccion, despues a lesiona.  Urbano Kock a fungi como gran defensa derecho. Richard Jacobs goleador contra di Mexico a hunga hopi bon wega. Remigio Jacobs goleador contra di Panama tabata hopi regular den su weganan.

   Di otro parti di e seleccion, tambe tabatin hungadornan cu a sobresali manera Ronny Elizabeth kende tabata goleador di e selecion cu 4 goal y sub-campeon di e torneo.  Tambe e hungador Eric Victoria como e ‘mihor back central’ di e torneo. Raymond Jansen cu bon hugada den seleccion. Rignald Hato cu su gran actuacion den goal. Treciendo recuerdo nan grandi di su omo, esta Don Ergilio Hato den su tempo den Centro America. Ainda e to wordo recorda na Guatemala y Centro America.  Tambe di e hungador Franklin Flokker, un medio defensivo, hungando tur e weganan, hopi regular.

   E seleccion aki di 1964 tabata uno cu a marca historia pa Antiyas y Aruba.  Cu hungadornan humilde y puro crioyo, cu tabata hunga futbol den Campeonatonan local riba e islanan aki.  Recordando 60 aña di gloria.

   E autor Ronny Elizabeth ta manda un cordial salud y bendicion pa e compañeronan na bida y paz y eternidad descanso pa e compañeronan cu a sosega den nomber di Dios. Paz y Amen.