ORANJESTAD (AAN): Departamento di Impuesto ta indica cu manera conoci, dia 31 di januari 2025 ta e ultimo dia cu por paga impuesto di vehiculo di motor di aña 2025.
Por haci pago na un di nos oficinanan of online via banco.
Paga online via banco
Den e dianan aki nos oficinanan ta basta druk. Nos ta recomenda nos contribuyentenan pa haci e pago online den comodidad di nan cas of oficina. Scoge Bill Pay, DIMP, MB y yena e siguiente descripcion: persoonsnummer-periodo-nummerplaat
Ehempel: 65234510-2025-A92000
Importante
Pa e procesamento di pago online bay mas rapido y corectamente ta pidi pa:
- controla si e persoonsnummer ta e mesun cu ta registra riba e nummerplaat;
- haci un transaccion di pago pa cada number.
Haci un cita
Despues di haci e pago, mester haci un cita y upload e comprobante di pago di banco y seguro. DIMP lo duna e recibo ora cu bin busca e plachinan riba dia di e cita.
Debe atrasa
Tuma nota cu na momento cu nos ta registra e pagonan online, nos ta controla prome si no tin debe di motorrijtuigbelasting atrasa (2024 bay atras). Si tin debe atrasa, nos lo procesa e pago riba e impuesto di e añanan bieu prome y no riba e impuesto di aña 2025.
Tur debe atrasa tin cu wordo paga prome cu por paga e impuesto di aña 2025. No ta posibel mas pa haya areglo di pago pa impuesto di vehiculo di motor.
