Cooperacion regional cu Sint Maarten ta fortalece infrastructura y innovacion digital

Minister Herdé

ORANJESTAD (AAN): Como parti di su compromiso pa modernisa y fortalece e sector di infrastructura na Aruba, Minister di Infrastructura, Rene Herdé, a reuni cu Minister di Infrastructura (VROMI) di St. Maarten, Patrice Gumbs, Secretario General di VROMI, Kenson Plaisimond, director di Kadaster St. Maarten, Benjamin Ortega y director interino di DLV Aruba, Louis Boekhoudt, den un encuentro oficial di introduccion pa pone base pa un colaboracion mas estrecho entre e dos paisnan.

Durante e reunion, ambos Minister a comparti nan vision tocante maneho di infrastructura y a explora oportunidad pa intercambia conocemento, experiencia y miho practicanan pa beneficio di Aruba y Sint Maarten.

Entre e temanan principal cu a wordo discuti tabata e fortalecemento di cooperacion entre Kadaster di Sint Maarten y Dienst Landmeetkunde en Vastgoedregistratie (DLV) di Aruba, cu e meta pa optimalisa administracion di tereno y registracion di propiedad.

Tambe a analisa e diferente sistema digital cu e dos paisnan ta uza pa maneho di tereno, incluyendo e programa TERENO, pa intercambia experiencia tocante reto y solucionnan den e proceso di digitalisacion di servicio publico.

Otro punto importante tabata e uzo di analisis di dato procedente di camaranan publico pa identifica solucionnan innovativo pa mobilidad y maneho di trafico. Den e contexto aki, Aruba a comparti e progreso cu a logra den uzo di tecnologia pa sostene decisionnan basa riba dato.

Ademas, a intercambia informacion tocante implementacion di Geographic Information Systems (GIS) den diferente organizacion gubernamental y diferente aplicacion cu e tecnologia aki por ofrece pa planificacion, infrastructura y maneho di espacio.

Minister Herdé a enfatisa cu cooperacion regional ta esencial pa enfrenta e retonan cu islanan den Caribe ta confronta. “Door di comparti conocemento y experiencia, nos por logra solucionnan mas eficiente y sigui modernisa e servicio cu nos ta ofrece na nos ciudadanonan,” Minister Herdé expresa.

Gobierno di Aruba ta sigui comprometi na innovacion, digitalisacion y colaboracion regional como instrumentonan importante pa fortalece e capacidad institucional y sigui construi un infrastructura moderno pa futuro.